Nyu-Yorkda tennis bo‘yicha yilning so‘nggi «Katta dubulg‘a» turniri — US Open start oldi.

Musobaqaning asosiy davrasida ishtirok etayotgan hamyurtimiz Kamilla Rahimova, jahon reytingida 92-pog‘onada borayotgan holda, birinchi bosqichda dunyoning 29-raketkasi — chexiyalik Barbora Kreychikovani sensasion tarzda mag‘lubiyatga uchratdi.

Teng kurashlar ostida o‘tgan birinchi setda Rahimova tay-breykda ustun kelib, 7:6 hisobida g‘alaba qozondi. Ikkinchi setda esa hamyurtimiz tashabbusni to‘liq o‘z qo‘liga oldi va 6:2 hisobida zafar quchib, uchrashuvni ikki setda o‘z foydasiga hal qildi.

Shu tariqa, Kamilla Rahimova US Open musobaqasining keyingi bosqichiga yo‘l oldi.

Shuningdek, bugungi kechki dasturda yana bir tennischimiz Mariya Timofeeva ham kortga chiqadi. Jahon reytingida 86-o‘rinni egallab turgan Timofeevaga 149-pog‘onadagi sloveniyalik Tamara Zidanshek raqiblik qiladi.