«Real Betis» dushanba kungi mashg‘ulotni transfer oynasi yopilishiga qadar klubni tark etishi mumkin bo‘lgan bir qator futbolchilar ishtirokida o‘tkazdi. Ayni paytda sport departamentining asosiy transfer maqsadi Dani Sebalyos bo‘lib qolmoqda.
Iker Losada, Pablo Garsiya, Nelson Deossa va Alvaro Fidalgo kelajagi noaniq bo‘lishiga qaramay, mashg‘ulotda ishtirok etdi. Jamoani tark etishi mumkin bo‘lgan yana bir futbolchi Gonsalo Petit esa jarohat sabab mashg‘ulotda qatnashmadi.
Klubning rejasi — avvalo Sebalyos transferini yakunlash. Agar tarkibdan muhim futbolchilardan biri ketsa, «Betis» Manuel Pellegrini talabi asosida tayanch yarim himoyachisini ham olib kelishga harakat qilishi mumkin.
So‘nggi mish-mishlarga qaramay, dushanba tongi holatiga ko‘ra, Natan yoki Abde bo‘yicha klubga hech qanday rasmiy taklif kelib tushmagan.
Shanba kuni «Levante»ga safarda 2:5 hisobida mag‘lub bo‘lganidan so‘ng Pellegrini mashg‘ulot oldidan futbolchilar bilan uzoq suhbat o‘tkazdi. Jovani Lo Chelso esa keyinchalik jamoa bilan qisman mashg‘ulot olib bordi.
«Betis» La Liga mavsumini muvaffaqiyatli boshlab, «Real Sosyedad» va «Valensiya»ni bir xil — 1:0 hisobida mag‘lub etgan edi. Biroq keyingi turda «Levante»dan yirik hisobda yengildi.
Endi sevilyaliklarni murakkab taqvim kutmoqda: juma kuni ular «Real»ni qabul qiladi, seshanba kuni esa Chempionlar ligasida «Lill»ga qarshi bahs bilan yevrokubok mavsumini boshlaydi.
