«Milan» yarim himoyachisi Luka Modrich uning yoshi haqidagi gap-so‘zlar bezovta qilmasligini aytdi. Xorvatiyalik futbolchi 9 sentyabr kuni 41 yoshni qarshilaydi.
«Mening yoshim haqida 2019 yildan beri gapirishadi. O‘shanda 33-34 yoshda ekanimni, endi yuqori darajada o‘ynay olmasligimni aytishgandi. Vaholanki, aynan o‘sha paytlarda faoliyatimdagi eng yaxshi futbolimni namoyish etayotgandim.
Shundan keyin yana ikki marta Chempionlar ligasini yutdim, 2022 yilgi jahon chempionatida Xorvatiya terma jamoasi bilan uchinchi o‘rinni egalladim, Millatlar ligasi finaligacha yetib bordim va yana boshqa sovrinlarni qo‘lga kiritdim.
Muhimi — maydonda nima qilayotganingiz. 18, 30, 40 yoki 50 yoshda bo‘lishingizning hech qanday ahamiyati yo‘q. Yosh — shunchaki raqam, ammo odamlar uni go‘yo qandaydir vasvasaga aylantirib yuborishadi», — deya Modrichning so‘zlarini keltiradi AS nashri.
