"Atletiko" bosh murabbiyi Diyego Simeone hujumchi Jonatan Devid bilan ishlash bo‘yicha dastlabki taassurotlari bilan o‘rtoqlashdi.

"Bizga u "Lill"da qanday futbolchi bo‘lgan bo‘lsa, xuddi shunday holatda kerak. Biz u bilan gaplashdik. Unda jamoamizga yordam bera oladigan sifatlar bor.

Bizga uning imkon qadar tezroq moslashishi kerak. Hozir bu jarayon davom etyapti, chunki u yaqindagina keldi. Biz uning ishtiyoqli va juda kuchli motivasiyaga ega ekanini ko‘ryapmiz.

Umid qilamizki, maydonda u o‘zi xohlayotgan va biz undan kutayotgan narsani bera oladi", — deya Simeonening so‘zlarini AS nashri keltirdi.

Devid yozgi transfer oynasining oxirida "Yuventus"dan "Atletiko"ga o‘tdi.

Kanada terma jamoasi hujumchisi madridliklar safida ijara asosida o‘ynaydi. "Atletiko"da uni keyinchalik to‘liq sotib olish imkoniyati ham bor.