AQSHning Nyu York shahrida yilning eng so‘nggi “Katta dubulg‘a” turniri — AQSH ochiq chempionati davom etmoqda. Serena va Vinus Uilyams US Open turnirining ayollar juftlik bahslarida uzoq tanaffusdan so‘ng yana birga kortga chiqdi. Biroq afsonaviy opa-singillar ilk uchrashuvdayoq mag‘lubiyatga uchradi.
Ular musobaqaning birinchi davrasida tayvanlik Chan Hao-CHing va avstraliyalik Maya Joint juftligiga qarshi bahs olib bordi. Qariyb uch soat davom etgan murosasiz uchrashuvda Uilyamslar jamoasi 3:6, 7:6, 6:7 hisobida imkoniyatni boy berdi.
Serena va Vinus hal qiluvchi setda 1:4 hisobida ortda borayotgan bo‘lsa-da, hisobni tenglashtirishga muvaffaq bo‘ldi. Tay-brekda esa opa-singillar 5:0 hisobida oldinga chiqib olgan edi. Shunga qaramay, ular ustunlikni saqlab qola olmadi va bahsni mag‘lubiyat bilan yakunladi.
Opa-singil Uilyamslar US Opendagi juftlik bahslarida 2022-yildan beri ilk marta birga kortga chiqdi. Ular avvalroq ushbu turnirning ayollar juftlik bahslarida ikki marta — 1999 va 2009-yillarda — chempion bo‘lgan.
Mag‘lubiyatga qaramay, Serena va Vinus Uilyamsning kortga qaytishi US Open tomoshabinlarining olqishiga sabab bo‘ldi. Opa-singillar 14 marta “Katta dubulg‘a” turnirlarining juftlik bahslarida g‘olib chiqqan.
