«Sent-Etyen» Fransiya ikkinchi divizionida ajoyib natijalar qayd etmoqda. Nomdor klub chempionatning dastlabki beshta uchrashuvida ham g‘alaba qozonib, yuqori divizionga qaytish borasidagi jiddiy maqsadlarini yaqqol namoyon qildi.

Hammasi 1-turda «Sosho» ustidan 3:0 hisobidagi g‘alaba bilan boshlandi. Keyin «Sent-Etyen» «Klermon»ni 3:1 hisobida mag‘lub etdi. Shundan so‘ng «Grenobl» 4:0 hisobida tor-mor qilindi.

Navbatdagi turda jamoa «Dijon»ni 3:2 hisobida yengdi. Bu hozircha «Sent-Etyen» uchun mavsumdagi eng qiyin g‘alaba bo‘ldi.

Shanba kuni esa jamoa «Monpelye»ni ham 3:1 hisobida mag‘lub etib, g‘alabali seriyasini davom ettirdi.

Liga 2da bunday muvaffaqiyatli startni so‘nggi bor 2018 yilda «Mets» qayd etgan edi.

Keyingi turda «Sent-Etyen» «Dyunkerk»ka qarshi maydonga tushadi. Uchrashuv 12 sentyabr kuni bo‘lib o‘tadi.