«Liverpul» himoyachisi Milosh Kerkez jamoa bosh murabbiy Andoni Iraola tomonidan joriy etilayotgan intensiv pressingni qo‘llashda duch kelayotgan qiyinchiliklar haqida gapirib berdi.

«Biz bunday pressing o‘ynaganimizda, butun uchrashuv davomida buni amalga oshirish ancha qiyin. Biz dastlabki 30–35 daqiqada va ikkinchi bo‘lim boshida yana ma’lum vaqt shunday pressing qilishimiz mumkin. Ammo keyin eng muhimi — zichlikni saqlab qolish va bir-birimizga yordam berishdir», — dedi Kerkez «Liverpul» rasmiy saytiga bergan intervyusida.

«Ipsvich»ga qarshi o‘yinda (2:0) mersisaydliklar ushbu mavsumda ilk bor o‘z darvozalari daxlsizligini saqlab qolishdi. Kerkez, shuningdek, jamoa Iraolaning talablariga bosqichma-bosqich moslashayotganini ta’kidladi.

Ha, albatta. Menimcha, hamma maydonda o‘zini ishonchliroq his qildi. Men ham o‘yinga yaxshiroq kirishib borayotganimni va o‘sayotganimni his qilyapman. Biz g‘alabadan xursandmiz, ammo juda uzoq bayram qilolmaymiz — endi o‘yinlar har 3 kunda bo‘lib o‘tadi va keyingisiga tayyorgarlik ko‘rish kerak», — deya qo‘shimcha qildi himoyachi.

«Liverpul» oldida 7 kun ichida 3 ta qiyin o‘yindan iborat seriya kutib turibdi. Seshanba kuni jamoa Chempionlar ligasida Madridning «Atletiko» klubiga qarshi o‘ynaydi, so‘ng APLda «Fulxem» bilan to‘qnash keladi va Angliya liga kubogida «Tottenxem»ga qarshi bahs olib boradi.