Fransiya Liga 1 chempionatining uchinchi turi ajoyib rekord keltirdi — bo‘lib o‘tgan to‘qqizta o‘yinning yettasi mehmonlarning g‘alabasi bilan yakunlandi, shu jumladan «Strasburg»ning «Trua»ga qarshi kechgan (6:2) bahsi ham shular jumlasidandir.

Ma’lum bo‘lishicha, Fransiya chempionatida hali hech qachon bir turda birdaniga yettita mehmondagi g‘alaba qayd etilmagan edi. Bu Fransiya chempionatining oliy ligasi uchun mutlaq rekord bo‘ldi.

Ta’kidlash joizki, joriy mavsumda hali ochko yo‘qotmagan yagona klub — «Monako» turnir jadvalida peshqadamlik qilmoqda. Kuni kecha monegasklar mamlakat gegemoni va chempioni — «PSJ»ni mag‘lub etishdi. «PSJ» esa o‘z navbatida hozircha bor-yog‘i o‘n uchinchi o‘rinda bormoqda.