«Roma» bosh murabbiyi Jan Pyero Gasperini Chempionlar ligasi umumiy bosqichi starti oldidan jurnalistlar bilan suhbatlashdi.

Rimliklar 1-turda 10 sentyabr kuni safarda Turkiyaning «Fenerbaxche» klubiga qarshi maydonga tushadi.

«Biz juda qaynoq muhitda o‘ynaymiz va o‘z xarakterimiz hamda darajamizni sinab ko‘rishni istaymiz. Bu raqiblarning barchasi o‘z chempionatlaridagi kuchli jamoalar bo‘lib, tarkibida juda yuqori saviyadagi futbolchilar bor.

Teng kechayotgan o‘yinda ular bir lahza ichida natijani o‘zgartirib yuborishga qodir. Shuning uchun doimo hushyor bo‘lishimiz kerak. Biroq shu bilan birga o‘z kuchimizga ishonishimiz va raqiblarga xuddi shunday muammolar tug‘dira olishimizni tushunishimiz lozim», — deya Gasperinining so‘zlarini Football Italia keltiradi.

«Biz yaxshi formadamiz. Hozircha maydonga tusha olmaydigan yagona futbolchi — Lorenso Pellegrini. Uning tez orada safga qaytishiga umid qilamiz. Biz bu yangi sarguzashtga tayyormiz», — dedi murabbiy.

«Roma» Chempionlar ligasida so‘nggi bor 2018/19 mavsumida ishtirok etgan. O‘shanda rimliklar 1/8 finalgacha yetib borib, ikki o‘yin natijasiga ko‘ra «Portu»ga 3:4 hisobida imkoniyatni boy bergan edi.

Shu tariqa, «Roma» 7 mavsumlik tanaffusdan so‘ng Chempionlar ligasiga qaytmoqda.