Hakam Rozario Abisso sud orqali hakamlar korpusidan chetlatilishi haqidagi qarorni bekor qildirdi va faoliyati tiklanganidan so‘ng Italiyadagi ilk tayinlovini oldi.

Palermolik 40 yoshli hakam 12 sentyabr kuni bo‘lib o‘tadigan B Seriya 4-turidan o‘rin olgan «Vichensa» — «Yuve Stabiya» uchrashuvini boshqaradi.

Abisso 1 iyul kuni hakamlar ro‘yxatidan chiqarilgandi. Bunga uning tegishli toifada faoliyat yuritish uchun belgilangan maksimal muddatga yetib borgani sabab bo‘lgan.

Biroq hakam Italiya hakamlar assosiasiyasi va Italiya futbol federasiyasi qarori ustidan shikoyat qildi. Ish ko‘rib chiqilguniga qadar Abisso o‘zini ro‘yxatdan chiqarish haqidagi qarorni vaqtincha to‘xtatishga erishdi. Shu tariqa u faoliyatini davom ettirib, mavsumoldi yig‘inda ham ishtirok eta oldi.

3 sentyabr kuni Italiya futbol federasiyasining Federal milliy tribunali Abissoning shikoyatini qanoatlantirdi. Sud hakamni ro‘yxatdan chiqarishni nazarda tutgan qaror qismini noqonuniy deb topdi.

Shundan so‘ng Abisso yana uchrashuvlarga tayinlana boshladi. 5 sentyabr kuni u Gresiya chempionati 3-turidan o‘rin olgan AYEK — «Aris» (5:0) bahsida VAR hakami sifatida ishladi. Uning yordamchisi yana bir italiyalik hakam Franchesko Meravilya bo‘ldi, uchrashuvni esa gresiyalik Aleksandros Sakalidis boshqardi.

Endi Abisso Italiyada bosh hakam sifatida ham ishiga qaytadi. U 2015 yildan buyon mamlakat chempionati o‘yinlarida hakamlik qilib kelmoqda. So‘nggi mavsumlarda u VAR hakami sifatida ham muntazam tayinlanib kelgan.