«Chelsi» bosh murabbiyi Xabi Alonso London klubi hujumchisi Joao Pedroning saviyasiga yuqori baho berdi. Shuningdek, u Karlo Anchelotti braziliyalik futbolchini JCH-2026 uchun terma jamoa tarkibiga chaqirmagani haqida ham fikr bildirdi.

Kecha 23 yoshli hujumchi Angliya Premyer-ligasining avgust oyidagi eng yaxshi futbolchisi deb topilgani ma’lum qilindi.

«Joao Pedroni Xoland bilan bir qatorga qo‘yish mumkinmi? Menimcha, ha. Agar Premyer-liganing eng yaxshi hujumchilarini sanaydigan bo‘lsak, Joao albatta ular qatorida bo‘ladi. Xoland ham, tabiiyki, shu ro‘yxatda. Men uni aynan shunday baholayman.

Ko‘p jihatdan Joao Pedro menga Benzemani eslatadi. U jarima maydoni ichida ham, tashqarisida ham yaxshi harakat qiladi, chap qanotga surilishi, bosh bilan yaxshi o‘ynashi mumkin. U juda ko‘p qirrali va aqlli futbolchi. Ha, u hali yosh, yana rivojlanishi kerak bo‘lgan jihatlari bor, ammo unda juda ko‘p ajoyib fazilatlar mavjud.

Braziliya terma jamoasiga chaqirilmagani haqida gapiradigan bo‘lsak, unga qo‘shimcha motivasiya kerak emas edi. Unda buning o‘zi ham yetarlicha bor. Albatta, bu holat unga yoqimsiz bo‘lgan, ammo bu endi o‘tmishda qoldi. Hozir biz u nimani yaxshi bajarayotgani va yana qaysi jihatlarda o‘sishi mumkinligiga e’tibor qaratyapmiz.

U ajoyib futbolchi. Gap faqat futbolda emas, balki uning xarakteri, yetukligi va mehnat qilish istagida ham. Uning bu mavsum uchun aniq maqsadi bor — ajoyib yil o‘tkazish va ko‘p gol urish», — deya Alonsoning so‘zlarini BBC Sport keltirmoqda.