"Tottenxem"ning ikki nafar muxlisasi ko‘tarib turgan banner ijtimoiy tarmoqlarda katta qiziqish uyg‘otdi.

Translyasiya kadrlarida ikki qiz futbolchilardan juda oddiy iltimos qilgani aks etgan. Ular g‘alaba, sovrin yoki futbolka so‘ramagan — faqat jamoadan gol kutishgan.

"Iltimos, gol uring!" — deb yozilgan bannerda.

Bu bannerning kulgili, ayrimlar uchun esa alamli jihati shundaki, "Tottenxem" Angliya Premyer-ligasining dastlabki 4 turida birorta ham gol ura olmadi.

Shanba kuni Roberto De Dzerbi shogirdlari o‘z maydonida "Everton" bilan 0:0 hisobida durang o‘ynadi va muxlisalarning iltimosini bajara olmadi.

Ayni paytda "Tottenxem" 2 ochko bilan APL turnir jadvalida 17-o‘rinni egallab turibdi. Jamoaning to‘plar nisbati — 0:5.