«Manchester Siti» hujumchisi Erling Xoland «Manchester Yunayted» darvozasiga urgan goli haqida fikr bildirdi. Ushbu to‘p APL 4-turidan o‘rin olgan uchrashuvda yagona gol bo‘ldi va ofsayd ehtimoli sabab bahslarga ham sabab bo‘ldi.
«Menimcha, kimdir to‘p yo‘nalishini biroz o‘zgartirgandek bo‘ldi, chunki odatda men ofsayd holatida qolmayman. Shuning uchun Maykl Oliverga u meni ofsaydda deb o‘ylaganidan biroz xafa bo‘lganimni aytdim», — deya Xolandning so‘zlarini Sky Sports keltirdi.
«Men murabbiyga qaradim, u esa bosh barmog‘ini ko‘tarib ishora qildi. Shunda gol hisoblanganini tushundim va nishonlashga tayyorlandim. G‘alaba qozonish har doim yoqimli, men buni hech qachon oddiy holdek qabul qilmayman. Ayniqsa, «Old Trafford»da o‘n kishi bo‘lib g‘alaba qozonish juda yoqimli. Bu oson vazifa emas».
«Manchester Siti» 12 ochko bilan turnir jadvalida ikkinchi o‘rinni egallab turibdi. Jamoa navbatdagi uchrashuvini 17 sentyabr kuni Angliya Liga kubogi doirasida «Norvich»ga qarshi o‘tkazadi.
