Angliya Premyer-ligasi tomonidan 114 ta moliyaviy qoidabuzarlikda ayblanayotgan «Manchester Siti»ga tahdid solayotgan mumkin bo‘lgan sanksiyalarning yana bir varianti ma’lum bo‘ldi. The Athletic nashri APLning ismi oshkor qilinmagan sobiq top-menejeri bilan bo‘lgan shaxsiy suhbatga tayanib xabar berishicha, klubdan uch yildan besh yilgacha bo‘lgan muddat davomida 20 ochkodan 25 ochkogacha olib tashlanishi mumkin.

Manba ma’lumotlariga ko‘ra, g‘oya klubni elit diviziondan chiqarib yuborish emas, balki uni turnir jadvalining o‘rtasidagi «o‘lik zona»da ushlab turish va shu orqali Yevropa musobaqalarida ishtirok etishdan keladigan daromadlardan mahrum qilishdan iborat. Oldinroq eng yomon ssenariyda «Siti» professional futboldan chetlatilishi mumkinligi haqida xabar berilgan edi.