"Milan" klubining xorvatiyalik yarim himoyachisi Luka Modrich hayotda amal qiladigan asosiy tamoyili va o‘zi uchun eng muhim deb hisoblaydigan insoniy fazilatlar haqida fikr bildirdi.
Tajribali futbolchining ta’kidlashicha, har qanday vaziyatda ijobiy kayfiyatni saqlash va atrofdagilarga yordam berish uning hayotiy shioriga aylangan.
"Mening hayotdagi o‘rnim va yondashuvim doimo ijobiy kayfiyatni saqlash hamda atrofimdagi insonlarga yordam berishdan iborat bo‘lgan.
Ayniqsa, kimdir og‘ir davrni boshdan kechirayotganini ko‘rsam, u bilan suhbatlashishga, maslahat berishga va qo‘llab-quvvatlashga harakat qilaman.
Xuddi shu tamoyilga butun jamoa bilan munosabatlarda ham amal qilishga intilaman. Doimo ijobiy ruhni saqlash, imkoniyat tug‘ilganda yordam berish va boshqalarga yaxshi o‘rnak bo‘lish men uchun juda muhim.
Buni o‘z mehnatim, xulq-atvorim va boshqa harakatlarim orqali ko‘rsatishga harakat qilaman. Bir so‘z bilan aytganda, jamoaning ahil ishlashi yoki oilaning farovonligi uchun muhim bo‘lgan barcha jihatlarda namuna bo‘lishni istayman", — deya Modrichning so‘zlarini keltiradi Pianeta Milan nashri.
Eslatib o‘tamiz, Luka Modrich 2025 yildan buyon Italiyaning "Milan" klubi sharafini himoya qilib kelmoqda.
