Ўз майдонида Ўзбекистон билан дурангдан кейин корейс ОАВлари терма жамоа бош мураббийи Ули Штиликени танқидлар остида қолдиряпти. Жумладан, мамлакатдаги нуфузли «Кукмин Илбо» нашри «Ботқоқликка ботган Штилике бригадаси ва жавобсиз қолган саволлар» деган сарлавҳа остида танқидий мақола чиқарди.
«Рақибни ботқоқликка ботириш тактикаси иш бермади. Аксинча, Штилике ва унинг бригадаси ботқоқлик қаърига чўкди. Чўкаётган жамоага Золушка ҳам ёрдамга келмади. Хуллас, бир қанча саволларни жавобсиз қолдирган ўйин бўлди», - деб бошланади мақола.
«Ўткир хужум ва янги футболчиларни кашф этишга қаратилган тажриба иш бермади. Ўйин натижаси ҳам, тактика ҳам ўта ёмон. ФИФА рейтингида биздан пастларда жойлашган Ўзбекистон билан қарама-қаршиликларимизнинг дуранглар устунини тўлдириб бердик. Июнь ойидан бошланадиган ЖЧ саралаш босқичида ҳужумдаги хилма-хилликни юзага чиқариш учун дастлабки дақиқалардан майдонга тушган янги футболчилар бир-бирларини тушунмадилар. Бутун ўйин давомида биз умид қилган футболчи кўзга ташланмади. Аксинча, Ўзбекистонга имкониятлар тақдим этиб юбордик ва ҳимоямиз бечораҳол ҳолатга тушди», - дея терма жамоани аямай танқид қилди «Кукмин Илбо» газетасининг интернет саҳифаси.
«Даилиан» нашри эса «Ваъда берилган ғалаба ҳам, режалаштирилган тажриба синови ҳам барбод бўлган ўйин», дея сарлавҳа билан ёзди. «Даилиан» нашри ўта норози руҳда терма жамоани танқид қилди:
«Ку Жа Чол рақиб дарвозасини ишғол қилганидаёқ навбатдаги ғалаба чўнтагимизда деган хаёлга берилган эдик. Салкам 40 минг томошабин терма жамоанинг ғалабасига шубҳа қилмаётганди. Аммо ғалаба ҳам, ўйиндан олинадиган тажриба ҳам барбод бўлди. Терма жамоа нурсиз ўйини билан Ўзбекистон устидан 21 йилдан бери давом этаётган устунлигимизни кесиб қўйди».
Отабек Йўлдошев
Жанубий Корея, Сеул
