12 апрель куни олий лигада 4-тур учрашувлари давом эттирилади. "Пахтакор" Навоийда "Қизилқум" меҳмони бўлади.

Юрий Лукин бошчилик қилаётган "Қизилқум" 3 турдан кейин 4 очко тўплаган. Ҳужумчи Баҳриддин Ваҳобов эса 3 ўйинда рақиблар дарвозасини 5 марта ишғол қилди. Бу жамоа ўз майдонида ҳар қандай рақибга жиддий муаммо яратиши билан ажралиб туради.

Олий лигада "Пахтакор" "Қизилқум" билан 30 бор куч синашган. Уларнинг 25тасида "шерлар" зафар қучган, бир бор рақиб ғалаба қозонган ва 4 ўйинда дуранг қайд этилган. Жамоамиз 83, "Қизилқум" 17 тўп киритган. Охирги очкони рақиблар 2010 йил Тошкентдаги учрашувда олишган - 0:0. Сафарда кечган 15 учрашувнинг 13тасида жамоамиз ютган, 2 марта дуранг кузатилган. Сафардаги ғалабаларнинг 5таси йирик ҳисобда қўлга киритилган. Олий лигадаги энг йирик натижа 2007 йил Зарафшондаги ўйинда содир бўлган. Ўшанда "Пахтакор" мезбонларни 11:0 ҳисобида мағлубиятга учратган. Сўнгги марта "Пахтакор" меҳмонда 2002 йил очко йўқотган.

Ёшлар таркиблари 11 апрель, шанба куни Навоийдаги "Сўғдиёна" стадионида соат 16:00да учрашувни бошлашади. Асосий жамоалар 12 апрель, якшанба куни соат 17:30да Навоийдаги "Ёшлар" спорт мажмуасида беллашувни бошлаб беришади.

«ҚИЗИЛҚУМ» - «ПАХТАКОР»
Ҳакамлар: Азиз Асимов (Тошкент), Маъмур Саидқосимов (Тошкент), Андрей Снетков (Тошкент вилояти), Даулетой Жалимов (Нукус).
Назоратчи: Ғайрат Каримов (Тошкент).
ЎзПФЛ вакили: Бобур Ҳайдаров.