Англия чемпионатининг 33-тур марказий баҳсида Лондондаги “Стемфорд Бриж” стадионида “Челси” ва “Манчестер Юнайтед” жамоалари ўзаро тўқнаш келишди.
Ушбу мавсумда "Челси"нинг чемпионликни қўлга киритишига ҳеч ким шубҳаланмаётган эди. Ҳаттоки, лондонликлар мазкур ўйинда ютқазишганида ёки дуранг ўйнашганида ҳам барибир олтин медалларга эга чиқишарди. Шунчаки ушбу масала бироз ортга сурилиши мумкин эди, холос. Аммо Моуриньо жамоаси чемпионликни жуда ҳам ортга сурилишини исташмади. "Челси" яна 3та ғалабадан кейин чемпионликни нишонлаши мумкин бўлади.
Ушбу ўйинга ҳар иккала жамоа ҳам кўтаринки руҳда етиб келди. Ван Гал шогирдлари “Тоттенхэм”, “Ливерпуль” ва “Манчестер Сити” каби клубларни мағлуб этганидан сўнг 3-поғонага мустаҳкам жойлашиб олган бўлса, Моуриньо шогирдлари энг яқин таъқибчиси бўлган “Арсенал”дан 1 ўйин кам ўтказган ҳолда 7 очко олдинда бораётганди.
Учрашув анча шиддатли тарзда кечди. Ўйин тақдирини ягона гол ҳал қилди. 38-дақиқада Оскарнинг ажойиб узатмасидан кейин Эден Азар бирга бир вазиятда Де Хеа дарвозасини ишғол қилди.
Меҳмонлар ҳарчанд уринишмасин Куртуа дарвозасига йўл топа олишмади. Шу тариқа “Челси” муҳим 3 очкони қўлга киритиб, чемпионликка яна бир қадам ташлади.
АПЛ, 33-тур
"Челси" - "Манчестер Юнайтед" 1:0
Гол: 1:0 – 38 Азар.
Челси – Куртуа, Иванович, Кэйхилл, Терри, Аспиликуэта, Зума, Матич, Оскар (Рамирес, 67), Фабрегас (Оби Микел, 90), Азар (Виллиан, 90), Дрогба.
Манчестер Юнайтед – Де Хеа, Валенсия, Смоллинг, Макнэйр, Шоу (Блэккетт, 80), Эррера, Мата (Янузай, 70), Руни, Феллайни, Янг (Ди Мария, 70), Фалькао.
Огоҳлантиришлар: Дрогба (54), Иванович (57), Оскар (63), Эррера (90).
