Хабарингиз бор, миллий чемпионатимиз олий лигасининг 9-турида Навоийнинг "Қизилқум" жамоаси "Бухоро" футболчилари меҳмони бўлади. Мазкур учрашув 16 май куни Бухоро шаҳрида ўтказилади.
Охирги турда ўз майдонида "Қўқон-1912" жамоасидан (3:1) устун келган кончилардан мухлислар навбатдаги ўйинда ҳам ғалаба кутишмоқда. Шу боис, навоийлик мухлислар "Қизилқум" жамоасини Бухородаги учрашувда ҳам стадионда туриб қўллаб-қувватлашни режалаштиришган. "Қизилқум" ишқибозлар клуби ташаббуси билан икки юздан зиёд мухлис "Бухоро" спорт мажмуасига сафар қилади.
Навоийлик ишқибозларга қулайликлар яратиш мақсадида Навоий шаҳридан махсус автобуслар қатнови уюштирилади. Режага кўра, "Қизилқум" жамоасини Бухородаги учрашувда қўллаб-қувватлашни хоҳловчи мухлислар Навоийда "Сўғдиёна" стадиони олдида тўпланишади. Автобуслар 16 май куни соат 12.00 да Навоийдан йўлга чиқади. Бу ташаббус "Қизилқум" ПФК томонидан маъқулланди ва автобуслар мухлислар учун текин хизмат қилади.
Мурожаат учун телефон — +998913333773.
Эслатиб ўтамиз, "Бухоро" — "Қизилқум" жамоалари баҳси 16 май куни соат 18.30 да бошланади.
