“Манчестер Юнайтед” бош мураббийи Луи ван Гал Англия Премьер-лигасининг 34-тури доирасида ўтказилган “Арсенал” (1:1) билан ўйиндан кейин жамоа дарвозабони Давид Де Хеанинг келажаги ҳақида ўз фикрларини билдириб ўтди.

“У биздан осонликча кетмайди. “МЮ” – катта жамоа ва Де Хеа бу жамоанинг бир қисми бўлишни истайди. Бироқ Давид – испан ва у “Реал” каби буюк жамоага кетиши мумкин. Давидга якуний қарор қабул қилиш қийин бўлади. Икки буюк жамоадан бирини танлаш қийин масаладир.

Бироқ Де Хеа қолади, деб кафолат беролмайман. Трансфер – бу ўйинчи, унинг жамоаси ва бошқа клуб иштирок этадиган жараёндир. Агар у сафимизда қолса, жуда хурсанд бўлардик.

Жароҳат ҳақида айтадиган бўлсак, Давиднинг тиззаости пайида жароҳати бор”, деб айтиб ўтди ван Гал.

Эслатиб ўтамиз, Мадриднинг “Реал” клуби 24 ёшли дарвозабонни сотиб олишни режалаштирмоқда.