“Бунёдкор” – “Олмалиқ” учрашувидан кейинги матбуот анжуманида биринчи бўлиб олмалиқликлар устози Игорь Шквирин иштирок этди.

- Бунақанги ўйин билан “Бунёдкор”ни ютиб бўлмасди. Бугунги ўйинимиз у қадар яхши чиқмади. Миллий терма жамоа бош мураббийи қайси футболчиларни кузатганини билмадим-у, аммо ҳеч бир футболчи унда яхши таассурот қолдирмаган бўлса керак. Биз жуда кўп хавфли вазиятлар яратамиз. Аммо улардан кам фойдаланамиз. Бугун эса деярли вазият ярата олмадик. Заҳирадан ўйинни кучайтирадиган футболчимиз ҳам йўқ эди. Голли вазият ярата олмадик. Натижада ютқаздик. “Олмалиқ” сафардаги ўйинларда у қадар ёмон ўйнамаяпти. Масалан, бу йил “Бунёдкор”дан учралган мағлубиятни ҳам қўшиб ҳисоблаганда атиги учта ўйинда ютқаздик. Статистика бўйича меҳмондаги ўйинларимиз ўтган йилгига қараганда яхшиланган. Давралар оралиғида таркибимизни кучайтирамиз. Аммо кимнинг ҳисобига ёки ниманинг ҳисобига кучайишимизни ҳозир айта олмайман. Олтинчи ўринни эгаллагандан маъно йўқ. Шу боисдан ҳам таркибни кучайтириб, совринли ўринлар учун курашамиз, - дейди Игорь Анатольевич.