Германиянинг Галле шаҳрида бокс бўйича анъанавий халқаро турнирга старт берилди. 42-бор ташкил этилаётган мазкур мусобақада мамлакатимиз чарм қўлқоп усталари ҳам ғолиблик учун кураш олиб боришади.
Халқаро турнирнинг дастлабки куни бир қатор вазн тоифаларида саралаш босқичининг илк беллашувлари бўлиб ўтди. Ҳамюртларимиздан Исроил Мадримов (-69 кг) кореялик Сенгуэн Ли устидан 3:0 ҳисобида зафар қучган бўлса, яна бир юртдошимиз Рустам Тўлаганов ҳам россиялик Денис Хаматов устидан 3:0 ҳисобида ишончли ғалабани қўлга киритди.
Биринчи кунги баҳсларда, шунингдек, терма жамоамизнинг яна икки аъзоси Муроджон Аҳмадалиев (-56 кг) ва Улуғбек Хақбердиев (-75 кг) рингга кўтарилдилар. Афсуски, ҳар икки боксчимиз ҳам илк беллашувдаёқ имкониятни бой бердилар.
Бугун қолган вазн тоифаларида ҳам саралаш босқичининг дастлабки баҳслари ўтказилади. Хасанбой Дўсматов (-49 кг) кореялик Вонхво Ким, Бургут Хожибаев (-60 кг) германиялик Гаши Эдше, Шахрам Ғиёсов (-64 кг) Германия терма жамоасининг яна бир вакили Дахинтен Эйджен, Зухриддин Маҳкамов (-81 кг) мўғилистонлик Эрденбаяр Сандагсурен ва ниҳоят Баҳодир Жалолов (+91 кг) Флориан Шульц (Германия) билан баҳс юритадилар.
23 июль куни Аброржон Қодиров (-52 кг) ҳам дастлабки учрашувини ўтказади. Ҳамюртимиз ўзининг илк учрашувини германиялик Рони Библикка қарши ўтказади.
