“Қизилқум” — “Насаф” учрашувидан сўнг ўтган матбуот анжумани биринчи қисмида меҳмонлар бош мураббийи Рўзиқул Бердиев иштирок этди.

Ўтган турда ўз майдонимизда “Бухоро” қарши ўйинда қимматли икки очкони бой бергандик, — дея сўз бошлади Рўзиқул Саъдуллаевич. — Бугунги ўйинда фақат ғалаба иштиёқида майдонга тушдик. Учрашув давомида тўпни кўпроқ назорат қилишга ҳаракат қилдик ва шунинг эвазига муҳим уч очкони қўлга киритдик, деб ўйлайман. “Қизилқум” жамоаси ўйини ҳам ёмон таассурот қолдирмади. Улардаги шижоатга ҳавасим келди. Бир сўз билан айтганда, Навоийдаги учрашувда томошабинлар ҳам ҳужумкор ва кескин футболга гувоҳ бўлдилар.

Илҳом Шомуродов жароҳати туфайли “Бухоро”га қарши ўйинни ўтказиб юборганди. Бугун унинг майдонга қайтиши жамоамиз ўйинини кучайтирганлиги шубҳасиз.Чемпионатда кутилмаган натижаларнинг қайд этилиши мухлисларимизга ҳам ёқяпти, деб ўйлайман. Кейинги пайтда қайд этилаётган натижалардан кўриниб турибдики, ҳали чемпионат охирламасдан туриб совринли ўринлар учун курашаётган жамоалар алоҳида ажралиб қолишмоқда. Биз қолган учрашувларда ҳам фақат мухлисларни қувонтириш ва юқори ўринлар учун курашиш мақсадида майдонга чиқишга интиламиз.