Янги мавсумни Хихондаги нурсиз дуранг (0:0) билан бошлаган «Реал» кучли танқидга дуч келди. Лекин Рафа Бенитес «тегирмон»дан бутун чиқиш йўлини топа олади.
Гол уриш муаммоси
Мавсумолди тайёргарлик доирасидаги 8та ўртоқлик учрашувларининг тенг ярмида «Қироллик клуби» рақиблар дарвозаси томон йўл тополмаганди. Энди «Рома», «Милан», «Валеренга» ҳамда «Бавария» клублари билан қайд этилган қониқарсиз натижалар қаторига «Спортинг»га қарши чемпионатнинг илк беллашуви ҳам қўшилди. Бироқ испаниялик мураббий буни муаммо сифатида қабул қилмаяпти. «Бизда ҳаммаси жойида. Таркибимиз ҳужумчига муҳтож эмас. Сафимизда Бензема ва Хесе каби иқтидорлар, исталган пайтда ҳужум чизиғини кучайтира оладиган Роналду бор». Хихондаги «қуруқ» ўйиндан кейин Бенитес қуйидагича фикр билдирди: «Ғалаба учун бизга ҳал қилувчи тўп узатилиши ва аниқ зарбалар етишмади!»
Тўғри, пойтахтликлар дарвозани ишғол этиш учун рақибдан кўра кўпроқ вазиятларни яратишди. Лекин 22та зарбанинг 8таси аниқ чиқди, холос. Улар ҳам самара бермади. Эътиборли жиҳати шундаки, сўнгги 3 мавсумда «Реал» атиги 3та беллашувда 0:0 ҳисобини қайд этган: ўтган йили ЕЧЛ доирасидаги «Атлетико»га қарши баҳс, 2012|2013 йиллар мавсумида «Осасуна» ва 2013|2014 йиллар мавсумида «Хатива»га қарши ўйинлар. Дарвоқе, Бенитес билан умуман чиқиша олмайдиган Жозе Моуриньонинг Мадриддаги қисқа фаолияти ҳам («Мальорка» билан) айнан шундай бошланганди.
Мухлислар инъоми
Ўз ишқибозларининг таъна-дашномлари етмагандек, «Реал» футболчиларига маҳаллий ишқибозлар ҳам «илтифот» кўрсатишди - Хихонга ташриф буюрган клуб автобуси учун ажратилган махсус жой Каталониянинг таниқли жамоаси рамзлари билан безатилди.
Ҳужумчиларга эркинлик
«Мен ўз шогирдларимга эркин ҳаракатланиш имкониятини яратишни хуш кўраман», - дея жавоб қайтарганди мураббий Гарет Бэйлнинг позицияси хусусидаги саволга жавобан. Аммо у кўзлаган эркинлик тез орада тартибсизликка айланди. Уэльслик ҳужумчи «иккинчи тўлқин» сифатида дарвозага хавф солишга урингандек бўлди. Бироқ у Хамес ёки Исконинг ўтган мавсумдаги савиясида ўйнай олмади. Олдинги чизиқда тўсатдан пайдо бўлган Хесе шунчалик «жон куйдирди»ки, 56 дақиқа ичида бор-йўғи 2 марта зарба йўллади! Бошқа чизиқ вакилларига қаратилган саволлар ҳам етарли. Масалан, мазкур беллашувда Данило Коэнтраудан устун эканлигини исботлай олдими? Матео Ковачичга ишонч билдирган мураббий қандай омиларга таяниб иш кўряпти?
Роналдунинг донишмандлиги
Устозидан фарқли ўлароқ, Криштиану Роналду ўз жамоасининг омадсиз стартини хаспўшламади: «Сизнинг муҳаббатингиз кучимга куч, ғайратимга ғайрат қўшади, танқидий фикрларингиз ўсишдан тўхтаб қолишга имкон бермайди». Ҳа, «Қироллик клуби»га келганидан буён Бенитес етарлича таъна-дашномларни эшитди. Фақат жамоада силжиш сезилмаяпти.
Черишевнинг йўқлиги қандай изоҳланмоқда?
Хорхе де Хуан, шарҳловчи: «Денис Черишевнинг «Реал»даги келажаги аввал бошиданоқ мавҳум эди. Ҳозир ҳам вазият шундайлигича қолган. «Спортинг»га қарши ўйинда унинг «заявка»га киритилмагани буни кўрсатиб турибди. Футболчининг расмий вакили Хинес Карвахаль клуб вакиллари билан учрашиб, Денисни «Вильярреал»га қайтаришни таклиф этди. Бироқ Рафа Бенитес жамоа ёзги трансфер мавсумида таркибни кучайтира олмаганини баҳона қилиб, Черишевни қўйиб юбормаслигини айтди. Албатта, Денис тентак эмас, унга АПЛ вакиллари жиддий қизиқаётганликларидан хабардор. Бир нечта ноль билан ифодаланадиган маош ёш ярим ҳимоячини Испания пойтахтидан чиқиб кетишга ундаши аниқ. Дарчанинг ёпилишига саноқли кунлар қолган бўлсада, ҳали кўп ишларни амалга ошириш мумкин».
