"Пахтакор" - "Сўғдиёна" жамоалари учрашувидан кейин бош мураббийлар матбуот анжуманида иштирок этишди.
Даврон ФАЙЗИЕВ ("Сўғдиёна" бош мураббийи): - Ўйин биз кутгандек оғир ва шиддатли кечди. Жамоамиз ҳозир ҳар бир ўйинда ўз кучини кўрсатишга ҳаракат қилмоқда. Биз учун гол уриш жуда қийин, лекин тўп ўтказиб юбориш шунчалик осон бўляпти. Айни пайтда "Пахтакор"дек рақибга қаршилик кўрсатиш имконига эга эмасмиз. Олдинда яна 5 тур мавжуд ва жадвалнинг қуйи қисмида кураш кескин кечишига шубҳа йўқ. "Сўғдиёна"нинг олий лигада ўрнини сақлаб қолишга кучи етишига ишонаман.
Ҳозир пул пайдо бўлгани билан бизда етарли савияда тўп тепадиган ижрочилар йўқ. Футболчиларнинг садоқати йўқ деб айтиш мумкин, бироқ ҳозир олий лигада "Пахтакор"дан бошқа жамоада садоқатли ўйинчилар борлигини кўрдингизми? Бошқа клубларда бундай ўйинчилар йўқ.
