Биласиз, айни пайтда "Локомотив" футбол клубининг икки нафар тарбияланувчиси Англия биринчи дивизиони вакили "Флитвуд Таун" сафида ўз маҳоратларини оширмоқда.

Дарвозабон Рустам Нартажиев ва ҳимоячи Сергей Прохоров клубларнинг ўзаро ҳамкорлигига кўра, у ерда уч ой малака оширишади.

“Темирйўлчилар” матбуот хизматининг маълумот тарқатишича, ўзбекистонлик футболчилар "Флитвуд Таун"да Бэрри Николсон қўл остида машғулотларда иштирок этишяпти. Яқинда ёш дарвозабонимиз Рустам Нартажиев "Флитвуд Таун" клуби расмий сайтига интервью бериб, Англиядаги ҳаёти ҳақида гапириб берди.

"Менга бу ердаги ҳаёт ёқяпти. Машғулотларда астойдил ишлаяпмиз. Қолаверса, баъзи пайтларда ёш болакайларни шуғуллантиряпман. Авваллари болалар билан бирга ишламагандим ва бу иш менга ёқиб қолди. Эҳтимол, шу нарса сабаб бўлиб фаолиятимни якунлаганимдан сўнг дарвозабонлар мураббийи бўлиб ишласам ажаб эмас".

"Прохоров иккаламиз бу ерга 18 сентябрь куни келгандик. Шундан бери орадан бир ой вақт ўтди ва ҳозирча асло зерикканимиз йўқ. Менга Англиянинг об-ҳавоси ҳам маъқул келди. Бу ерда ҳаво бизга нисбатан анча илиқ экан. Жамоадошларим Серёга иккаламизга кўп нарса ўргатишяпти: маҳаллий урф-одатлар, инглиз тилида гапириш. Ҳозир инглизчани анча яхши ўрганиб олдим".

"Бу ердаги машғулотлар жуда оғир экан. Ўзбекистонда ҳар кунлик машғулот деярли бир хил давом этади. Англияда эса ҳар куни ҳар хил машқларни бажарамиз ва бу менга ёқяпти".

"Бизда кунига бир маҳал машғулот бўларди, бу ерда эса баъзан бир кунда уч марта шуғулланамиз. Мен ҳар куни ўзимда ўзгаришларни ва ўсишни ҳис қиляпман. Бу ерда ўрганаётганларим кейинчалик жуда асқотади деб ўйлайман".