“Андижон” ва “Сўғдиёна” жамоалари ўртасидаги ўйиндан сўнг ўтказилган матбуот анжуманининг биринчи қисмида меҳмонлар бош мураббийи Даврон Файзиев иштирок этди.
-Авваломбор, Ички ишлар ҳодимларини бугунги касб байрами билан жаомамиз номидан табриклайман. Афсуски, бугун ҳам мағлубиятга учрадик. Ўйин тўғрисида нима дейишим мумкин? Ўйинни ҳамманглар кўрдинглар, учрашув жуда қизиқарли ҳамда муросасиз руҳда ўтди. Иккала жамоага ҳам ғалаба сув ва ҳаводек зарур эди. Шогирдларимнинг ўйинига ҳеч қандай эътирозим йўқ. Чиройли ўйин намойиш этган бўлсак-да, натижага эриша олмадик. Меҳмонда мазмунли ўйин кўрсатиб, кўплаб имкониятлар яратиш ҳамма жамоанинг ҳам қўлидан келмайди. Андижонга мағлубиятга учрамаслик мақсадида келгандик. Афсуски, бизга лаёқатлик етишмади. Бугун “Андижон” жамоаси ҳужумчиси Анвар Бердиев ёш муҳим роль ўйнамаслигини кўрсатиб қўйди ва ўйин тақдирини у ҳал қилди. Агар Бердиевнинг ўрнида бошқа бир ҳужумчи бўлганда, биринчи голда тўпга югурмасди. Бердиев ёшларга ҳужумчи қандай бўлиш кераклигини кўрсатб берди. Бугунги ғалабадан кейин “Андижон” жамоаси ўз олдига қўйган вазифасини 80 фоизга бажарди десак ҳам бўлади. Биз ҳам қолган турларда керакли очколарни қўлга киритишга ҳаракат қиламиз. Ҳали ҳеч нима йўқотилгани йўқ ва охиригача курашамиз. Бундай жамоа билан олий лигадан тушиб кетишни кўз олдимга келтира олмайман. Бир йилда 90 фоизга ўзгариб шундай ўйин намойиш этишнинг ўзи бўлмайди. Бунинг учун шогирдларимга раҳмат айтаман.