Бугун Ўзбекистон миллий жамоаси Қатар пойтахти - Доха шаҳридаги Grand Hamad Stadiumда ЖЧ-2018|ОК-2019 қўшма саралаши доирасида Яман термаси билан куч синашади.
Биз одатимизга кўра, машғулот якунида айрим футболчиларимизга юзланиб, уларнинг фикрлари билан қизиқдик.
Сервер Жепаров (терма жамоа ярим ҳимоячиси):
- КХДР термасига қарши ажойиб ўйин намойиш этдик. Учрашув ҳаммага ёқди, деб ўйлайман. Энг муҳими, навбатдаги 3 очкони қўлга киритиш баробарида Пхеньянда қайд этилган мағлубият учун реванш олдик. Эндиги рақибимиз - Яман термаси гарчи гуруҳ аутсайдери мақомида турган бўлсада, бу хотиржамликка берилишимиз кераклигини англатмайди. Мана, яманликлар Филиппиндан ғалаба билан қайтишди. Демакки, уларнинг ўйинларида ўсиш ва ўзгариш кутазилган. Хуллас, ўйинга пухта тайёргарлик кўряпмиз ва Дохадан ғалаба билан қайтишга астойдил ҳаракат қиламиз.
