Афсонавий украиналик футболчи, 1975 йилги "Олтин тўп" соҳиби Олег Блохин айнан ҳозир тўп сурганида бемалол "Барелона" ҳужумчиси Лионель Месси ва "Реал" етакчиси Криштиану Роналду савиясида фаолият юритган бўларди. Бу ҳақда собиқ форварднинг ўзи гапириб ўтди.
“Роналду тезлик ва абжирлик бобида менга ўхшайди? Йўқ, асло бундай эмас. Ҳеч қачон иккита бир хил футболчи бўлмайди. Криштиану жуда кучли ўйинчи, у дунёнинг энг зўр футболчилардан бири. Бежизга ҳар йили айнан у ва Месси “Олтин тўп”ни қўлга киритаётгани йўқ.
Ўйлашимча, агар мен айнан ҳозир фаолият юритганимда бемалол Роналду ва Месси даражасида тўп сурган бўлардим”, - дея “Спорт Экспресс” Блохиннинг сўзларини келтиради.
Эслатиб ўтамиз, Олег Блохин футболчилик фаолияти давомида 1974/75 ва 1985/86 йилги мавсумларда УЕФА Кубок эгалари кубогини қўлга киритган, 1982- ва 1986-йилги Жаҳон Чемпионатларида иштирок этган.
