«Челси» клуби собиқ бош мураббийи Жозе Моуриньо «Манчестер Юнайтед»ни бошқариш истагини билдирди.
52 ёшли португалиялик мутахассис «МЮ» раҳбарлари орасида унга қарши бўлганлар борлигини билади ва шу боис у манкунианликларга хат йўллади. Бу хатида у нима учун "МЮ"ни бошқариши кераклигини раҳбариятга тушунтириб берган.
Олти саҳифадан иборат мазкур хатда Моуриньо клуб бош мураббийи лавозимида ишлаш ишқида ёнаётганини, жамоа принципларига муносиб бўлишга тайёрлигини маълум қилган ҳамда батафсил ёзилган иш режасини тақдим қилди.
Таъкидлаш лозим, Моуриньо "Челси"дан истеъфога чиққанидан кейин унинг вакиллари «МЮ» билан алоқага чиққанди. Аммо клубдаги айрим раҳбарлар унинг номзодига қарши чиқиб келишмоқда. Бунга Жозенинг доимо жанжалларга аралашиб юриши, ҳимоявий футбол тарафдори экани, жамоа Академияси футболчиларининг ривожида мураббий дадил ҳаракат қила олмаслиги сабаб сифатида кўрсатилмоқда. Бу эса клуб фалсафасига мос эмас.
Шу боис Моуриньо «МЮ»га хат йўллади ва унда жамоадаги вазиятни батафсил таҳлил қилган.