«Барселона» ҳужумчиси Луис Суарес Чемпионлар лигаси чорак финалида «Атлетико»га қарши кечган баҳсда иккита гол киритди ва жамоасининг 2:1 ҳисобидаги ғалабасига ҳисса қўшди.

Шу тариқа уругвайлик ҳужумчи ЕЧЛда киритган голлари сони 15 тага етди. Бунинг учун у 23 та учрашувда майдонга тушган. 29 ёшли Суаресдан илгари бу маррани Месси забт этган ва у 15 та гол уриши учун ЕЧЛнинг 29 учрашувида майдонга тушиши лозим бўлган. Раул 33 ўйинда, Криштиану Роналду 51 ва Златан Ибраҳимович 28 та учрашувда иштирок этгач 15 та гол уришга муваффақ бўлганлар.

Бу борада Луис Суарес 23 ўйинда 15 та гол билан энг яхши натижа қайд этиб турибди.