Биласиз, бугундан Олий Лигада 7-тур учрашувлари старт олади.

Тур доирасидан ўрин олган қизиқарли тарзда кечиши кутилаётган беллашувлардан бирида Навоийнинг “Қизилқум” жамоаси “Бухоро”ни қабул қилади. Жорий йилги мавсумни анча кўтаринки руҳда ўтказаётган ушбу икки жамоа қарама-қаршилиги кўпчиликнинг диққат-эътибори марказида турибди.

Мавсум аввалида “Бухоро” таркибига келиб қўшилган ёш ҳимоячи Сардор Раҳмоновнинг бўлажак ўйин борасидаги фикрлари билан қизиқдик.

- “Қизилқум”га қарши баҳсга тайёргарлик яхши кетяпти. Ушбу ўйиннинг аҳамияти анча юқори. Сабаби Навоий ва Бухоро жамоалари тўқнашуви кичик дерби мақомида ўтади. Шу сабабдан ҳам ҳар икки жамоа футболчилари майдонга фақат ғалабани кўзлаган ҳолда чиқишади. Биз ҳам сафардан ғалаба билан қайтишни мақсад қилганмиз.

Аммо “Қизилқум”ни мағлуб этиш осон бўлмайди. Боиси ушбу клуб уйда ҳар қандай рақибни таслим эта олади. Умид қиламанки, “Бухоро” бу баҳсда зафар қучади ва агар мураббийларимиз майдонга чиқишимга имкон беришса, мен ҳам жамоам ғалабасига ўз улушимни қўшишга уринаман, - дейди истеъдодли футболчи SPORTS.uz интернет-порталимухбирига.

Таъкидлаб ўтамиз, “Қизилқум” – “Бухоро” учрашуви 30 апрель куни 19:00да бўлиб ўтади.