"Насаф" - "Андижон" учрашувидан кейин ташкил этилган матбуот анжуманиниг иккинчи қисмида мезбонлар бош мураббий Рўзиқул Бердиев иштирок этди ва ўйин ҳақидаги фикрлари билан ўртоқлашди.

— Мухлисларимизни бугунги ғалаба билан табриклайман. Ўйинга келадиган бўлсак, биринчи бўлимда “Андижон” жамоасининг мураббийлари томонидан ишлаб чиқилган тактика ўзини оқлади. Бу режани бузиш учун биз гол уришимиз керак эди. Ҳисобни очганимиздан сўнг, кўрдинглар, яна икки марта гол киритдик.

Бугунги учрашувнинг иккинчи бўлимида майдонга тушган Ислом Рашидхоновни кўрсатган ўйинини таъкидламоқчиман. У бугун ҳақиқатан жамоамиз ўйинини кучайтирди. Ўйлайманки, бугунги ғалаба йигитларимизга ОЧЛ ўйини олдидан катта руҳий далда бўлади.

Деян Больевичда ўйин амалиёти кам бўлса-да, учрашувда ўзини кўрсатишга харакат қилди. Ўйлайманки, унинг бугунги кўрсатган ўйини ҳам мухлисларда яхши таасурот қолдирди. У бугун ғалабага ҳисса қўшиш ва мухлислар меҳрини қозониш учун астойдил ўйнади. Сайдулло Раҳматовни бугун чап қанот ярим ҳимоясида ўйнатдик, аммо бу биз кутгандек натижа бермади.