“Навбаҳор” ва “Обод” жамоалари ўртасидаги учрашувдан кейин ўтказилган матбуот анжуманининг иккинчи қисмида Александр Волков журналистларнинг саволларига жавоб қайтарди:

- Ўйин борасида гап кетганида нима дейиш мумкин. “Обод” жамоасининг бир қатор учрашувларини кўриб таҳлил қилиб чиққандик. Тошкентликларни ҳам қишки йиғинлар чоғида чемпионатга жиддий тарзда тайёргарлик кўрганига гувоҳ бўлгандик. Бобур Зуҳриддиновни яхши биламан. Негаки қўл остимда шуғулланган. Афсуски, иқтидорли футболчи соғлиғи билан боғлиқ муаммо туфайли фаолиятини эртароқ якунлашга мажбур бўлганди. Ёш бўлишига қарамай яхши жамоани шакллантириб, тўғри йўлдан кетаётганлигини намойиш этмоқда.

Учрашувдан олдин футболчиларга осон бўлмаслиги ҳақида огоҳлантиргандим. Кичик хотиржамликка берилишдан ҳам улар самарали фойдаланишлари мумкинлиги хусусида уқтиргандим. Амалда ҳам шундай бўлди. Имконият яратиб беришгани учун рақиб ягона жавоб тўпини киритишга эришди. Иккинчи бўлимдаги қизил карточка эса ўйинни боришини бузиб юборди. Биринчи бўлимдаги ўйинимиздан қониқиш ҳосил қилмаганлигимиз сабабли танаффусда айрим ўзгаришларни амалга оширгандик. Лекин, қизил карточка баҳсни ўйлаганимиздек кечишига тўсқинлик қилди. Камчиликда қолганимиздан кейин ҳимояга эътибор қаратишга мажбур бўлдик. Шундай шароитда ҳам гол уриш учун учта яхшигина вазиятларни кўкка совурдик. Хуллас баҳс кутилганидек, қийин руҳда ўтди. Эътиборли жиҳати қийинчиликларни юзага келишига ўзимиз сабабчи бўлдик. Вазиятлардан фойдаланишдаги камчиликларимизни ҳанузгача бартараф эта олганимизча йўқ. Машғулотларда ушбу камчиликни бартараф этиш борасида ишлаётган бўлсакда, бунинг самараси унчалик кўринмаяпти.