"Бавария" бош мураббийи Хосеп Гвардиола "Атлетико"га қарши ўйиндаги мағлубиятда жамоа шифокорларини айблагани ҳақидаги хабарларга изоҳ берди.
"Кийиниш хонасидаги гаплар кийинишхонасида қолиши керак. Бу гапларни тарқатган одамлар менга зарар етказишга уринишган. Бу нарса охирги уч йилда кўп марта содир бўлди.
Мен футболчи ва клубнинг бошқа вакиллари билан суҳбатлашаман, ўз фикримни билдираман. Менга зарар етказишни истаганлар аслида клубга, жамоага зарар қилаётганликларини билмайдилар.
Бу нарса уч йилдан буён давом этиб келяпти. Мен бунга кўникдим. Мен футболчилар билан гаплашишим керак. Клубдаги маълумотлар матбуотга чиқиб кетяпти. БУ мен учун муаммо эмас, бунга кўникканман.
Янги мавсумда мен бу ерда бўлмайман, аммо у инсон шу яқин атрофда бўлади. Бу "Бавария"нинг муаммоси.
Бу инсонни излаш учун менинг вақтим йўқ. Бу унинг, ўша "юмронқозиқ"нинг муаммоси", - дейди Гвардиола.
Эслатиб ўтамиз, янги мавсумдан бошлаб Гвардиола "Манчестер Сити" клубини бошқаради.
