14 май куни Наманганда “Навбаҳор” ва “Қўқон-1912” ўртасидаги водий дербиси бўлиб ўтади. Олий лига 9-тур доирасидан ўрин олган мазкур баҳсга бўлган қизиқиш жуда юқори. Ушбу жамоаларнинг чемпионатдаги баҳсларига доир маълумотлар билан таништириб ўтамиз.
Ўзаро ўйинлар
Бу жамоалар шу кунга қадар Олий лига доирасида 20 марта ўзаро майдонга тушишган. Ўйинларнинг 14 тасида “Навбаҳор” ғалаба қозонган. Иккита учрашув дуранг натижаси билан якунланган. Тўртта баҳсда қўқонликларнинг қўли баланд келган. Тўплар нисбати 43-22, “Навбаҳор” фойдасига. Ўзаро ўйинларда наманганликлар 44 очко жамғаришган. Қўқонликларнинг бу борадаги кўрсаткичлари 14 очкога тенг.
Наманганда ўтган сўнгги бешта учрашув:
21.10.2015
Навбаҳор – Қўқон -1912 – 2:1 (0:1)
11.06.2003
Навбаҳор – Қўқон -1912 – 5:1 (1:1)
06.04.2002
Навбаҳор – Қўқон- 1912 – 2:0 (1:0)
26.06.2000
Навбаҳор – Темирйўлчи – 5:4 (3:3)
23.10.1999
Навбаҳор – Темирйулчи – 2:1
Собиқ жамоадошлар
Водий дербиси мақомини олган мазкур баҳсда яна бир қизиқарли ҳолатга дуч келишимиз мумкин. “Навбаҳор” сафида тўп сураётган бир қатор футболчилар “Қўқон-1912” жамоасида ўйнаган ёки қишки йиғин чоғида машғулотларда иштирок этган.
Ўтган мавсумда қўқонлик футбол мухлисларида яхши таассурот қолдирган Игорь Голбан 2016 йилни “Навбаҳор”да ўтказмоқда. У 14 май санасида расмий ўйинларда иккинчи марта собиқ жамоасига қарши майдонга тушади.
Учрашув ҳакамлари
Наманганда бўлиб ўтадиган “Навбаҳор” – “Қўқон-1912” жамоалари ўртасидаги баҳснинг мамлакатимизнинг энг яхши рефериларидан бири – Илгиз Танташев бошчилигидаги ҳакамлар гуруҳи бошқариб борадиган бўлди. Ўйин назоратчиси А. Абдуллаев.
Ушбу ҳакам жамоамизнинг жорий мавсумдаги биринчи расмий ўйини – “Обод”га қарши баҳсда ҳам фаолият олиб борганди.
Умуман олганда, Ильгиз бошқарган учрашувларда вакиларимиз ижобий натижаларга эришган. Бир ғалаба, бир дуранг. Ушбу ёқимли аънана Наманганда ҳам давом этишини тилаб қоламиз.
Учрашувнинг бошланиш вақтлари
Наманганда бўлиб ўтадиган учрашув соат 17:30да бошланади. Бугун эса ўринбосарлар баҳси ўтказилади. Бугунги ўйин 16:30да бошланиши режалаштирилган.
Навбатдаги водий дербисида вакилларимизга омад тилаб қоламиз.
