Зинедин Зидан мураббийлик фаолиятидаги илк мавсумида Чемпионлар Лигаси бош совринини қўлга киритишга жуда яқин турибди. Хўш, бундай шарафга яна кимлар сазовор бўлишган. Саволга жавоб топиш учун бироз ортга назар ташлаймиз…
Луи ван Гал («Аякс», 1995)
1995 йилда «Аякс» томонидан қўлга киритилган Чемпионлар Лигасидаги муваффақиятни бугунги кунда такрорлаш ҳамманинг ҳам қўлидан келавермайди. Ўз мураббийлик фалсафасига асос солган ва шогирдлари билан бирга улғайган Луи ван Гал қайсидир футболчини (Давидс, Бергкамп, Клюйверт) жамоанинг ёшлари таркибидан «суғуриб» олган бўлса, яна қайси бири (Яри Литманен, Жорж Финиди)ни арзимаган пулга сотиб олганди. «Аякс» Фабио Капеллонинг «Милан» жамоасини 1:0 ҳисобида мағлубиятга учратганда, голландиялик ашаддий футбол ишқибозларининг азалий орзуси йиллар ўтиб яна рўёбга чиққанди. Футбол мухлислари учун бундан-да ёрқинроқ лаҳза бўлмаса керак?
Марчелло Липпи («Ювентус», 1996)
Орадан бир йил ўтиб, айёр Луи финалда пенальтилар бўйича Марчелло Липпининг «Ювентус»ига ютқазиб қўйди. «Кекса синьора»га қадар ҳеч бир жамоа билан узоқ ҳамкорлик қилолмаган Липпи «Аталанта» ва Диего Марадонасиз қолган «Наполи» сингари ўртамиёна жамоаларга мураббийлик қилган, лекин улар билан бирорта ҳам «пичоқ»қа илинадиган совринга эришолмаганди. Унга омад 1995 йилда Турин жамоасида кулиб боқди — Марчелло «Юве» билан дастлаб Италия чемпионати, орадан бир йил ўтгач эса Чемпионлар Лигаси Кубогини қўлга киритди. Ўшанда туринликлар сафида тажрибали Жанлуку Виалли, навқирон Алессандро Дель Пьеро ва умидли Антонио Контелар тўп суришарди. Липпи кейинчалик ўз ўрнини замонавий Чемпионлар Лигасининг асосий «ҳукмдори» Карло Анчелоттига бўшатиб берган.
Висенте дель Боске («Реал», 2000)
16 йил муқаддам «Реал» клуби раҳбарияти жамоа бош мураббийини истеъфога чиқариб, ўрнига янги ғояларга бой мутахассисни таклиф этганди ва унинг ёрдамида навбатдаги «қулоқдор» кубокка сазовор бўлганди. Висенте дель Боске кўпчилик томонидан танбал-мураббий сифатида эътироф этилган Жон Тошакнинг ўрнига тайинланганди. Ўша даврда Висенте Икер Касильяс, Рауль ва Фернандо Морьентесларга ишонч билдирди ва бу ишонч «Қаймоқранглилар»га ҳисоб бўйича саккизинчи Чемпионлар Кубогини тақдим этди. «Галактикос» финалда «Валенсия»ни мағлубиятга учратди. Орадан икки йил ўтиб, дель Боске муваффақиятини «дубл»га айлантирди. «Хэмпден Парк» ўйингоҳида «Байер»га қарши кечган финал учрашувида ҳал қилувчи голни, топинг-чи, ким киритган? Зинедин Зидан! Вақтнинг ўтишини қаранг!
Жозе Моуринью («Порту», 2004)
Жозе Моуриньодан «қандай қилиб машҳур мураббий бўлиш мумкин»лиги бўйича сабоқ олмоқчимисиз? Бу борада сизга ёрдам берамиз. Бунинг учун биринчи навбатда таркибни кучайтиришнинг асло имкони бўлмаган аутсайдер жамоа жиловини қўлга олиб, уни имкон қадар рўйхатнинг юқорироқ поғонасига олиб чиқиш («Лейрия»-2002, 5-поғона), шундан сўнг кучли жамоага устозлик қилиб ўртамиёна ўйинчиларни «аравани бирга тортишга ундаш», УЕФА Кубогида «требл»га эришиб, сўнгги дамда Чемпионлар Лигасида муваффақият қозониш талаб этилади.
Ўша мавсумдаги шов-шувли муваффақиятни яқин келажакда ҳеч ким такрорлай олмаса керак — Моуриньо бошчилигидаги «Порту» ўз йўлида «Манчестер Юнайтед», «Лион» ҳамда «Депортиво» сингари кучли жамоаларнинг «бурнини ерга ишқалаганди». Чемпионлар Лигаси финалида «Аждарлар»ни яна бир кутилмаган совға — «Монако» кутиб турарди. Моуриньо бу рақибни ҳам 3:0 ҳисобида мағлуб этиб, машҳурликка ва «Челси»дек гранд жамоанинг таклифига мушарраф бўлганди.
Хосеп Гвардиола («Барселона», 2009)
Фикримга қўшиласизми — йўқми билмадим-у, лекин Хосеп Гвардиоланинг «Барселона»даги илк мавсуми фантастик лаҳзаларга жуда бой бўлганди. Ўшанда унинг «тики-така»си томошабинлар учун катта янгилик бўлганди. Ўша «Барселона» ҳар бир рақиби — «қайта тирилган» «Лион» ва Клинсманн/Хайнкес бошчилигидаги «Бавария»ни доғда қолдирганди. Баъзида уларга ҳакамлар ён босган пайтлар ҳам бўлди — Хеннинг Эвребе номли ярим финални бир эсланг-а, каталонияликлар жонига оро кирган бу ҳакамни «Аристократлар»нинг мухлислари бир умрга ёдларидан чиқаришмаса керак. Лекин финалда «Барселона» ҳаққоний ўйнади ва натижада кубок совриндорига айланди.
Роберто Ди Маттео («Челси», 2012)
Андре Виллаш-Боаш истеъфога чиқарилгач, унинг ўрнига «Челси» захирасидаги Ди Маттео мураббий этиб тайинланди. Португалиялик мутахассис ярим йиллик фаолияти давомида «Челси»ни пароканда қилишига бир баҳя қолди. Ди Маттеонинг ташрифи билан «Челси»да яна ҳаммаси ўз изига тушди — Терри, Коул, Лэмпард ва Дрогбалар яна эркинликни қўлга киритишди ва «Кўклар»нинг ЧЛдаги муваффақияти асосчиларига айланишди.
Бугунги «Атлетико»ни қайсидир жиҳатдан ўша «Челси»га ўхшатиш мумкин. Ди Маттео учун ўйиннинг ёрқинлиги ўнинчи, натижа эса биринчи ўринда бўлган. «Пенсионерлар» ўз жарима майдонларида автобус сингари «қалқон» ҳосил қилиб, қарши ҳужум ёрдамида рақибларини «тор-мор» келтиришган. Айниқса, бу тактика «Бавария»га қарши финал учрашувида жуда асқотди. Қизиғи, «Аристократлар» Чемпионлар Лигасида зафар қучган йили миллий чемпионатда пастки поғонада бўлган. Жорий мавсумда «Манчестер Сити»да «Челси»нинг натижасини такрорлаш имконияти бор эди, лекин «Шаҳарликлар» бунинг уддасидан чиқа олишмади…
Зинедин Зидан («Реал», 2016)…
Франциялик собиқ футболчи илк мавсумдаёқ «Реал»га клублар ўртасидаги энг нуфузли совринни тақдим эта оладими ёки йўқ? Бу саволга 28 май куни жавоб оламиз.
Рустам НУРИЛЛАЕВ
