21 — 22 май ва 8 июнь кунлари Ўзбекистон кубоги 1/8 финал жавоб учрашувлари ўтказилади. 

Дастлабки куни “Қўқон-1912” — “Навбаҳор”, “Андижон” — “Қизилқум”, “Обод” — “Бунёдкор”, “Олмалиқ” — “Металлург”, “Насаф” — “Нефтчи”, “Сўғдиёна” — “Машъал” жуфтликлари ўзаро куч синашса, 22 май куни “Бухоро” — “Пахтакор” жамоалари майдонга тушади. 8 июнда бўладиган “Локомотив” — ЎзДонгЖу учрашувидан сўнг, барча чорак финалчилар номи маълум бўлади.

Ўзбекистон Профессионал футбол лигаси Ҳакамлар қўмитаси қарорига кўра, 21 май куни Андижонда бўладиган“Андижон” — “Қизилқум” жамоалари баҳсини пойтахтлик Олим Толибжонов бошқариб боради.

Унга лайнсменлар Фарруҳ Ёрмуҳаммедов ҳамда Баҳодир Баҳромов (иккиси ҳам Тошкентдан)лар кўмаклашади.

Учрашувнинг захирадаги ҳаками этиб Акмалжон Раҳимов (Андижон) тайинланган.

Назоратчи Республика тоифасидаги ҳакам Арслон Ҳотамов ҳам Тошкент шаҳридан ташриф буюради.

Эслатиб ўтамиз, мазкур жуфтликнинг 25 мартда Навоийда кечган баҳсида 2:2 ҳисобида дуранг қайд этилган. Унда голларни мезбонлардан Шерали Жўраев (31), Баҳриддин Ваҳобов (45+1)лар киритган бўлса, жавоб тўпларига Неманья Йованович (8) ҳамда Исломбек Исоқжонов (51)лар муаллифлик қилишганди.