Хабарингиз бор, кеча Ўзбекистон Кубоги 1/8 финал жавоб учрашувлари бўлиб ўтди.
Мазкур босқич доирасидаги энг қизиқарли кўриниш олган матчлардан бирида “Андижон” ўз майдонида “Қизилқум”ни қабул қилди. Муросасиз курашларга бой тарзда кечган матчда “бургутлар” 3:1 ҳисобида ғалабага эришишди ва чорак финалга чиқишди.
“Қизилқум” жамоаси етакчиларидан бири Шерали Жўраев SPORTS.uz интернет-портали мухбирига ўйин борасидаги фикрларини билдириб ўтди.
- Дастлабки учрашувда 2:2 ҳисоби қайд этилгани боисдан Андижонга фақат ғалаба қозониш мақсадида борган эдик. Ўйинни ёмон бошламадик ҳам. Хатто ҳар иккала бўлимда ҳам тўп билан муомала қилиш борасида устунлик қилдик. Аммо яратилган қулай вазиятларни голга айлантириш бобида омадимиз чопмади. Рақиб эса бизнинг хатоларимизни муносиб жазолай олди. Шу сабабли ҳам якунда мағлуб бўлдик. Энди бор эътиборимизни Олий Лигага қаратамиз, - дейди тажрибали футболчи.
