Россия премьер-лигасида ўтган мавсумнинг якунига кўра йилнинг энг яхши дарвозабони аниқланди. “Огонёк” журнали томонидан таъсис этилган “Лев Яшин” номидаги мукофот “Ростов” клубининг дарвозабони Сослан Жанаевга насиб қилди.
Жанаев чемпионат ўйинларида қаторасига 775 дақиқа давомида ўз дарвозаси даҳлсизлигини сақлаб тура олди ва бу кўрсаткич бўйича 3-ўринга кўтарилди. Рекорд натижа 2000 йилда ўрнатилган бўлиб, 941 дақиқадан иборат ва “Локомотив” дарвозабони Руслан Нигматуллинга тегишли.
Мавсум давомида Жанаев ўз дарвозасидан бор йўғи 20 гол ўтказиб юборди, бу асосий дарвозабонлар орасида энг яхши кўрсаткичдир. “Ростов” клуби эса йил якунига кўра чемпионатда 2-ўринни эгаллаб, ўз тарихида илк маротаба ЕЧЛ саралаш босқичига йўлланма олди.
