Бокс бўйича 91 кг.гача бўлган вазнда Рио-де-Жанейро олимпиадасида иштирок этаётган Рустам Тўлаганов ўзининг дастлабки баҳсида ғалаба қозонди.
Ватандошимизга эквадорлик Хулио Сезар Кастильога рақиблик қилди. Бу боксчига қарши жанг Рустам учун осон кечмади. Биринчи ва иккинчи раундларда ҳакамларнинг барчаси устунликни ўзбек боксчисига берган бўлса, сўнгги раундда бир ҳакам эквадорлик спортчининг устунлигини эътироф этди. Ҳакамларнинг баллари — 3:0 (29:28, 30:27, 30:27).
Тўлаганов чорак финалда озарбойжонлик Абдулқодир Абдуллаевга қарши рингга кўтарилади. Бу вазнда чорак финал баҳслари 10 август куни бўлиб ўтади.
Бугун тунда энг енгил вазн тоифасидаги (49 кг.) боксчимиз Ҳасанбой Дўсматов ҳам ўз жангини ўтказади. Нимчорак финалда унга мексикалик Хоселито Велазкес рақиблик қилади. Жанг 01:00да старт олади.
