"Қўқон-1912 шанба куни навбатдаги водий дербисида майдонга тушади. Нўъмон Ҳасанов шогирдларининг бу галги рақиби – “Андижон” жамоаси бўлади. Мазкур учрашувга доир маълумотлар билан танишинг.
Ўзаро ўйинлар
Бу жамоалар Олий лига доирасида 21 марта тўқнаш келишган. Ўйинларнинг 9 тасида андижонликларнинг қўли баланд келган. Еттита баҳсда қўқонликлар ғалаба нашидасини суришган. Бешта ўйин дуранг натижа билан якун топган. Тўплар нисбати – 41-32, андижонликлар фойдасига. Ўзаро ўйинларда қўқонликлар 26 очкони қўлга киритган. Андижонликларнинг бу борадаги кўрсаткичи – 32 очкога тенг.
Биринчи даврада Қўқондаги баҳсда майдон эгалари 1:0 ҳисобида ғалаба қозонган. Ягона голни Носир Отақўзиев киритган.
Эски танишларнинг янги тўқнашуви
Водий дербиси мақомини олган мазкур учрашувининг эътиборга молик яна бир жиҳати шундаки, шанба куни эски танишлар яна бир бор учрашадилар. Бу гал рақиб сифатида. Айни дамда “Қўқон-1912” жамоаси мураббийлар штабида фаолият олиб бораётган тажрибали мутахассис Сергей Ковшов ўтган йили “Андижон” жамоасини бошқарганди. Энди эса собиқ жамоасига қарши кураш олиб боради. Шунингдек, қўқонликлар етакчиларидан бири Абдуллох Олимов ҳам “Андижон” сафида тўп сурган.
Ҳимоячи Иброҳим Раҳимов эса мавсумни андижонликлар таркибида бошлаган.
Йўқотишлар
Қўқонликлар навбатдаги ўйинга жиддий ҳозирлик кўрмоқда. Таркибда иккита йўқотиш бор. Жалил Кимсанов ва Отабек Ҳайдаров жароҳат олганликлари сабабли машғулотларда иштирок эта олишмаяпти.
Андижонда ўтказилган сўнгги бешта учрашув:
22.08.2015
Андижон – Қўқон – 1912 – 1:2 (1:2)
02.08.2003
Андижон – Қўқон – 1912 – 1:0 (0:0)
16.11.2002
Андижон – Қўқон – 1912 – 5:3 (1:1)
26.10.2000
Андижон – Темирйўлчи – 6:2 (3:0)
28.08.1999
Андижон – Темирйўлчи – 2:0 (1:0)
Учрашув ҳакамлари
13 август шанба куни Андижонда бўлиб ўтадиган “Андижон” – “Қўқон-1912” учрашувини 2015 йилда жаҳоннинг энг яхши ҳаками деб тан олинган Равшан Эрматов бошқариб боради.
Навбатдаги водий дербисида ҳам мухлислар ажойиб ўйиннинг гувоҳи бўлишларига шубҳа йўқ. Учрашув назоратчиси Гали Имомов.
Олий лига
18-тур
«Андижон» (Андижон) – «Қўқон-1912» (Қўқон)
Ҳакамлар: Р. Эрматов (Тошкент), А. Расулов (Тошкент), Ж. Саидов (Тошкент), Д. Акмалов (Тошкент)
Назоратчи: Г. Имомов (Тошкент).
ПФЛ вакили : Ф. Магометов.
Бошланиш вақтлари
Эртанги баҳс соат 18:00да бошланади. Бугун эса ўринбосарлар ўйнайди. Учрашув соат 17:30да бошланиши маълум қилинган.
Айтганча, ўтган йили Андижондаги “Соғлом авлод” ўингоҳида бўлиб ўтган “Андижон” – “Қўқон-1912” жамоалари ўртасидаги ўйинни айнан шу ҳакам бошқариб борганди. Ўйинда қўқонликлар ғалаба қозонишган.
