Қаршида маҳалла ёшлари ўртасида “Футболимиз келажаги” турнирининг ҳудудий финал босқичи бўлиб ўтди.

Анъанавий ўтказилаётган мазкур мусобақа иштирокчиларининг сафи йилдан-йилга кенгаймоқда. Буни жорий йил мусобақанинг қуйи босқичларида 10 мингга яқин ёшлар иштирок этганида ҳам кўриш мумкин. Президентимиз раҳнамолигида маҳаллаларда замонавий спорт мажмуалари барпо этилиб, уларда турли тўгараклар фаолияти йўлга қўйилгани ёш авлодни ҳар томонлама баркамол этиб тарбиялаш, истеъдод ва салоҳиятини юзага чиқариш имконини бермоқда.

“Маҳалла” хайрия жамоат фонди ва бошқа қатор ташкилотлар ҳамкорлигида ташкил этилган мусобақанинг қуйи босқичларида ғолибликни қўлга киритган 12 жамоа ўзаро баҳслашди.

Биринчи ўринни 9-10 ёшли болалар гуруҳида Шаҳрисабз туманидаги “Шакартери” қишлоқ фуқаролар йиғини, 11-12 ёшлилар ўртасида Шаҳрисабз туманидаги “Писанди” маҳалла фуқаролар йиғини ва 13-14 ёшлилар ўртасида Касби туманидаги “Обод юрт” маҳалла фуқаролар йиғини жамоалари эгаллади.