Манчестерлик болакайлар китобида “Тоҳир ва Зуҳра”га ўхшаш эртак бўлмаса керак. Бу икки ошиқ қиссаси бизга, фақат бизгагина тегишли. Лекин шу кунлардан бошлаб англиялик болакайлар ушбу эртакнинг бошқачароқ вариантини яшил майдонда кўра бошлашди. Ҳа, икки эркак ўртасидаги муносабатни Тоҳир-Зуҳрага менгзамоқчи эмасмизу, баъзи ҳолатлари жуда ҳам мос тушади. Яхши маънода, албатта.
“Интер”даги ажойиб мавсумдан буён Моуриньо ва Златан бир-бири ҳақида фақат илиқ фикр билдиради. Мураббий футболчилар ичида энг зўри деб швед юлдузини тан олади, Златан эса, у билан ишлаган жами мураббий зоти ичида Жозени тан олади. Ҳақиқий эркак мураббий деб хотирлайди.
Уларнинг йўли узоқ вақт кесишмай келди. Маур “Реал”даги фаолияти давомида Златанни жамоага таклиф қила олмасди, чунки швециялик иқтидор мадридликларнинг асрий душмани таркибида ўйнаб кетганди. Кейин, “Челси”даги фаолиятида ҳам бу ишга имконият йўқ эди чамамда. Бу пайтда Златан Франция чемпионатида рекордлар сари йўл олган, ўша рекордларни парчалаб ташламагунига қадар бошқа жойга ўта олмасди. Хуллас, уларнинг эртаги кутилмаганда - ҳа, аввалида бунга кўпчилик ишонмаганди – Манчестер шаҳрида бошланди. Эртакмисан эртак...
Златан ва Маур эртаги бу қадар кучли бошланади, деб ҳеч ким тасаввур қилмаганди. Иккисининг "Манчестер Юнайтед”даги илк ўйини айнан иккисининг бенефиси билан тугаганига нима дейсиз энди?! Йил давомида шу шаҳарга келиши муҳокама қилинган икки мэтрнинг биттагина учрашувда совринли бўлиши ҳам омаднинг юқори нотаси бўлса керак? Португалиялик мутахассис ўйин тугаши биланоқ икки йил давомида бор-йўғи биттагина кубокни қўлга киритган Ван Гаал билан солиштирила бошланди. Ваҳоланки, ўша Луи Манчестердаги фаолиятида олиб берган битта кубоги бўлмаганида, Маур ва Златан мавсумни бу қадар триумф билан бошламасдилар ҳам. Энди бу билан ҳеч кимнинг иши йўқ, ҳамма икки “телба” юлдузни олқишлаш билан овора...
Аслида, бу ерда ҳеч қандай тасодиф ё омад йўқ. Ҳаммаси шундай бўлиши керакдек. “Манчестер Юнайтед” шундай бошлаши керак эди аслида. Шунга лойиқ бўлиб улгурганди. Нега, дейсизми? Биринчидан, жамоа ичида рўй берган оламшумул воқеалар мавсум давомида Евро-2016 ўтаётган пайтда ҳам овоза солишда ушбу турнир билан рақотбатлашиб турди. Моуриньонинг “қизил иблислар”га ўтиши мураббийлар фестивалида юқори поғонадан тушмади. Швециянинг гуруҳ ўйинлари тугагач, Златан тўппа-тўғри Манчестер шаҳрига учиб келиб, бир лаҳзага Евротурнирни ҳам эсдан чиқартириб юборгани эсингиздан бордир?!
Маурнинг ташрифи билан клубга бир қатор аниқ мақсадни ифодаловчи ўйинчилар таклиф этилди. Португалиялик мутахассис янги мавсумда нималар қилмоқчи эканию, қандай натижаларни кўзлаётгани барчага маълум бўлди. У футболга ҳеч қандай фалсафа суқмаяжагини, шонли клубга шонли ўтмишини қайтариш учун ҳақиқий футбол намойиш этажагини кўрсатди.
Рус шарҳловчиларидан бири: “Моуриньо эркатой, шу боис, унга исталган ўйинчисини муҳайё қилиб беришади”, деб ёзибди. Тўғри, у эркатой бўлиши мумкин, бироқ чўнтагидан кетаётган ҳар бир центни асоссиз бермайдиган корчалонларга гапини уқтира олиш ҳам аслида санъат. Шу санъати борлиги учун ҳам Маур айни пайтда эркатойга айланган бўлса, бу унинг меҳнати ва шахсий ютуғидир.
Ибраҳимовичнинг ғалаба тўпини йўллаши ҳам тасодифлар туркумига кирмайди. Бутун ўйин давомида у қадар кўзга ташланмаган юлдуз муҳим паллада ўзини кўрсатди ва жамоасининг ғалабасини таъминлади. Яъниким, бу ғалаба айнан меники, деди. Кўп бўлади шунақа воқеалар ва ҳар доим швециялик “қария”нинг ҳаракатлари омад отлиқ шеригига қўшиб айтилади. Лекин тан олиш керакки, ҳамма бир нарсани кутаётган паллада ўша нарсанинг содир бўлиши бир томондан ёқимли бўлса, иккинчи томондан жуда мушкул вазифадир. Златан мана шундай босимни енга олди ва “МЮ”нинг бошланажак мавсумига-да таъсир қиладиган муҳим голни урди. Агар мавсум кўтаринки руҳда ўтса ва манчестерликлар юқори ўринларни қўлга киритишса, бу натижага асосий турки шу ГОЛдир, унутманг!
Манчестер шаҳрида байрам бошланди, хуллас. Лекин эртак чиройлироқ ва фожиалироқ кўриниш олиши учун яна қандайдир қаҳрамон керак. Ҳа, “Тоҳир ва Зуҳро”да ким бор эди, топдингиз – Қоработир! Бу вазифани аслида ирқий келиб чиқиши билан Погба бажариб бериши ҳам мумкин эдию, “Сити” тарафлардан жой эгаллаган Гвардиолага кўпроқ мос туюлмоқда. Хуллас, қирғинбарот жанг олдидан телевизоримиз олдига яхшилаб жойлашиб олайлик. Барча нигоҳларимиз Манчестер шаҳрига қадалган. Бу икки таниш инсон “эл-класико” деган сўзни Испаниядан Англияга кўчириб келишди, узр-а, ла-лигачилар...
