Бухоро вилоятининг Ғиждувон туманидаги “Зарангари” қишлоқ фуқаролар йиғинида замонавий стадион фойдаланишга топширилди.

Мамлакатимизда ёшлар ўртасида футболнинг оммавийлигини ошириш, унинг моддий-техник базасини мустаҳкамлаш, ёш авлодни жисмонан соғлом, маънан баркамол этиб тарбиялаш борасида амалга оширилаётган ишлар юксак самаралар бераётгани таъкидланди. Мазкур стадион ҳам ана шундай эътибор натижасида амалга оширилган лойиҳалардан биридир.

Футболни қўллаб-қувватлаш жамғармаси, Ғиждувон тумани ҳокимлиги ҳамда ҳомий ташкилотлар томонидан барпо этилган стадион ёшлар учун Мустақиллик кунига ўзига хос туҳфа бўлди.

Замонавий стадион барча қулайликларга эга. Бу ерда 4 минг нафар мухлисга мўлжалланган ўриндиқлар, юқори қувватли тунги ёритгичлар ўрнатилган. Футбол майдони ўлчамларининг халқаро андозаларга мувофиқлиги бу ерда мамлакатимиз миқёсидаги мусобақаларни ҳам ўтказиш имконини беради.

– Қишлоқ фуқаролар йиғини ҳудудида учта мактаб ва битта касб-ҳунар коллежи бўлиб, уларда футболга қизиқувчи ёшлар кўп, – дейди “Зарангари” футбол клуби раиси Фурқат Тоиров. – Улар стадионимиз қошидаги футбол тўгаракларида туман болалар ва ўсмирлар спорт мактабининг тажрибали мураббийлари раҳбарлигида маҳорат сирларини ўрганади. Бу ерда шуғулланадиган ёшлар орасидан сараланадиган истеъдод эгалари келгусида вилоят биринчилигида иштирок этаётган “Зарангари” жамоаси таркибидан ўрин олади.