Британиялик депутат Пол Флинн шотландиялик боксчи Майк Тоуэллнинг ўлимидан сўнг бокс қоидаларини ўзгартиришни талаб қилди. Бу ҳақда, The Guardian нашрига таяниб, «ТАСС» хабар бермоқда.

29 сентябрь куни Дэйл Эвансга қарши жангнинг бешинчи раундида Майк Тоуэлл нокаутга учради. У замбилда олиб чиқилди ва шифохонага етказилди. Бироз вақт ўтиб, 25 ёшли боксчи бош мия жароҳатлари оқибатида вафот этди.

«Биз бир нечта спорт турининг қоидаларини ўзгартириб, бош — инсон танасининг мўрт қисми эканини тушуниб етишимиз керак. Вазифамиз — спортчиларни ҳимоя қилиб, зарбалар оқибатида келиб чиқадиган бош жароҳатларини камайтириш. Бокснинг асосий мақсади рақибни хушсиз ҳолатга келтириш бўлиб қолди», — деди депутат.

Ўз навбатида, Буюк Британиянинг Headway хайрия ташкилоти боксни умуман бекор қилиш талаби билан чиқди.
«У (Майк Тоуэлл) ёш ота эди ва унинг асосий эътибори оиласини қўллаб-қувватлашга қаратилиши керак эди. Муаммо очиқлигича қолмоқда — бокс бекор қилинишидан аввал яна неча киши қурбон бўлиши керак? Бокс рухсат берилган спорт турлари рўйхатида қолар экан, кўплаб ёш инсонлар ҳаётдан кўз юмади ёки жароҳатлар туфайли оғир касалликларга чалинади», — деди Headway раҳбари.

Буюк Британия тиббиёт ассоциацияси ва Бутунжаҳон тиббиёт уюшмаси ҳам бокснинг бекор қилинишини қўллаб-қувватлади.
«Бош мия жароҳатларининг бир неча тури мавжуд. Шулардан бирида қон кичик миқдорда мияга қуйилади ва маълум вақт мобайнида ўлимга олиб келади», — маълум қилди Бутунжаҳон тиббиёт уюшмаси бош котиби.

Маълумот учун, Дэйл Эвансга қарши жанг олдидан Майк Тоуэлл профессионал рингда 12 жанг ўтказиб, 11 ғалаба ва 1 дурангни қайд этганди.