Sport нашрининг Twitter’даги саҳифаси Серхио Рамос ҳамда Андрес Иньестага тааллуқли голлар статистикасига эътибор қаратди.

Маълум бўлишича, футболчилик карьераси давомида Серхио Рамос Андрес Иньестага қараганда 5 та кўпроқ гол урган. Фаолиятини «Севилья» футбол клубида бошлаган ва 2005 йилги мавсумга келиб «Қироллик клуби»га кўчиб ўтган Серхио Рамос ҳозирга қадар рақиблар дарвозасига 77 та гол урган. Карьерасининг дастлабки йилларидан буён «Барселона» шарафини ҳимоя қилиб келаётган Андрес Иньестанинг умумий голлари эса 72 тани ташкил қилади.

Нашр бежизга бу икки футболчини танлаб олмаган. Бири Мадриднинг «Реал», иккинчиси эса Каталониянинг «Барселона» клубини майдонга сардор сифатида бошлаб тушади. Қизиқ томони, Серхио Рамос ҳимоя позициясида тўп суради, шунга қарамай голлари сони ҳужумга нисбатан яқинроқ ўйнайдиган Андрес Иньестаникидан кўп.

Маълумот учун, Андрес Иньеста «Реал»даги рақиби ва Испания терма жамоасидаги жамоадоши ҳисобланган Серхио Рамосдан 2 ёшга катта. Иньеста 1984 йилнинг 11 май санасида туғилган. Серхио Рамос эса 1986 йилнинг 30 март куни дунёга келган.