Теннис бўйича норасмий жаҳон чемпионати ҳисобланган Дэвис кубогининг Осиё ва Океания минтақасида Ўзбекистон терма жамоаси Жанубий Корея билан тўқнаш келиши керак эди. Бугун — 3 февраль куни унинг доирасида икки ўйин бўлиб ўтди ва ўзбекистонликларнинг икки энг кучли теннисчиси ўз иштирокини бошлади.
Биринчи бўлиб кортга мамлакатнинг иккинчи ракеткаси Санжар Файзиев чиқди. У жаҳон теннис рейтингида 367-ўриндан жой олган бўлса, Файзиевга рақиблик қилган Хён Чон 73-ўринда эди. Яъни, Денис Истоминдан ҳам уч поғона юқори. Бу ҳолат натижада ҳам кўринди. Теннисчиларнинг ўзаро ўйинида кореялик спортчининг қўли баланд келди. Беш сет давом этган геймнинг 2 та сетида зафар қучиш Файзиевнинг ғалабаси учун етарли бўлмади — 4:6, 4:6, 7:6, 6:4, 0:6.
Australian open—2017 да муваффақиятли иштирок этиб, жаҳоннинг иккинчи ракеткаси Новак Жоковични сенсацион тарзда турнирдан чиқариб юборган Ўзбекистоннинг биринчи рақамли теннисчиси Денис Истомин эса Файзиевдан кейинги геймда зафар қучиб, Ўзбекистон термасига 1 очко тақдим этди. У мезбонларнинг Дак Хи Ли исмли теннисчисига қарши кортга тушди ва биринчи сетни кутилмаганда бой берганди — 4:6. Кейинги уч сет давомида эса рақибидан устун келди — 6:2, 7:6, 6:4.
Дэвис кубоги
Осиё ва Океания минтақаси
3 февраль, жума
Хён Чон — Санжар Файзиев 6:4, 6:4, 6:7, 4:6, 6:0
Дак Хи Ли — Денис Истомин 6:4, 2:6, 6:7, 4:6
Эртага — 4 февраль куни жуфтлик беллашувлари бўлиб ўтади. 5 февраль куни ўтказиладиган яккалик баҳслари билан Жанубий Корея — Ўзбекистон ўйинида ғолиб номи аниқланади.
