2016 йилги ёзги Олимпиада ўйинларида ўзбекистонлик спортчиларнинг иштироки ва қўлга киритган мукофотлари катта шов-шувга айлангани сир эмас. 13 нафар спортчининг совринли ўринларни эгаллаб, олтин, кумуш ва бронза медаллар билан Ўзбекистонга қайтиши ғурур бағишлади.
 
Айни вақтда Олимпиада ғолиблари нафақат спортда, балки санъат ва маданият соҳаларида ҳам фаоллик кўрсатиб, концерт дастурларида, суратга олиш ишларида ҳам иштирок этишга улгуришяпти. Ана шундай спортчилардан бири Шаҳрам Ғиёсов.
 
Шаҳрам Ғиёсовнинг Instagram’даги саҳифаси диққатимизни тортди. Спортчи тахминан 1 ҳафта аввал хонанда Шаҳзоданинг клипи суратга олинаётган майдондан олинган фотосуратни ижтимоий тармоққа жойлаган. Бу орқали Шаҳрам Ғиёсов Шаҳзоданинг клипида роль ижро этаётганлигини тахмин қилиш мумкин эди. Бир неча кун аввал спортчи жойлаган видеоси орқали эса бу тахмин ўз тасдиғини топди.
 
Яқиндагина “Эътироф” мукофотини қўлга киритган Шаҳзода ва Dr.Costi ижросидаги “Billionaire” дуэти мухлислар томонидан илиқ кутиб олинган бўлса, эндиликда қўшиққа суратга олинган видеоклип янада катта қизиқишларга сабаб бўлмоқда.
 
Янги йил байрамидан сўнг, Дубайга саёҳат қилган Шаҳзода Instagram’даги саҳифаси орқали у ерда мазкур дуэтга клип суратга олингани ҳақида маълум қилганди. Суратга олиш ишлари Тошкентда ҳам давом эттирилди ва премьера қилиниши кутилмоқда. Ноодатий тарзда суратга олинган клипда Шаҳрам Ғиёсовнинг иштирокига баҳо бериш фурсати яқин.
 
Спортчи ўзининг ижтимоий тармоқдаги саҳифаси орқали яна бир маълумотни ошкор қилди. Футбол спорт турига ҳам бефарқ бўлмаган Шаҳрам Ғиёсов Мадриднинг “Реал” клубига мухлислик қилади. Унинг Олимпидада ғалабага эришган чоғида ўз ғалабасини худди Криштиану Роналдодек нишонлагани ҳам бунга яққол мисол.