Кеча нуфузи жиҳатидан Европада иккинчи ўринда турадиган Европа Лигаси мусобақасининг 1/16 босқич биринчи учрашувлари ниҳоясига етди. Чемпионлар Лигаси нимчорак финалининг дастлабки учрашувлари эса ҳафтанинг безагига айланди. France Football нашри бу икки мусобақа якунига кўра ўз рамзий термасини тузиб чиқди. Ушбу рамзий терма жамоа 4-2-3-1 схемасида бўлиб, кўпчилигини бу ҳафтанинг сўзсиз қаҳрамонларига айланишган “ПСЖ” футболчилари жой олди.
Эдерсон (“Бенфика”)
«Бенфика» посбони жамоасининг энг яхши ўйинчиларидан бири бўлди. Обамеянгнинг пеналтисини қайтарди. Бундан ташқари, габонлик ҳужумчи билан бир қаторда, Ройс, Пулишичнинг хавфли зарбаларини бартараф этиб, жамоасининг кичик устунлигини таъминлади.
Тома Менье (“ПСЖ”)
Менье ушбу рамзий терма жамоадан жой олган “ПСЖ”нинг беш футболчисидан дастлабкисидир. Ўз уйида «Барселона«ни «ер тишлатган» «ПСЖ» ҳимоячиси ҳақли тарзда бу терма жамоадан ўрин олган. Ўз қанотида Неймарни қуролсизлантира олган белгиялик ҳимоячи ҳужумда ҳам самарали ўйин кўрсатди. Унинг катта масофани босиб ўтиб Каванига оширган узатмаси якунда парижликларнинг йирик ғалабасини таъминлади.
Бенедикт Ҳёведес («Шалке 04»)
Гелзенкирхенликлар Европа Лигасида ўзини жуда яхши ҳис этмоқда. 7 учрашувнинг 6 тасида ғалаба ! «ПАОК»ни меҳмонда 3-0 ҳисобида енгган «Шалке 04» жамоаси жавоб учрашуви олдидан ажойиб натижага эришди. Немис жамоаси ҳимоячиси Ҳёведес эса грек жамоаси ҳужумларини ишончли тарзда бартараф этди. Бундан ташқари ҳужумда ҳам жамоасининг голига ассистентлик қилди.
Преснел Кимпембе («ПСЖ»)
Унай Эмерининг ажойиб кашфиёти. Жамоа сардори Тиаго Силванинг учрашувга яқин қолган бир пайтда жароҳат олиб ўйнай олмаслиги маълум бўлгач, испаниялик мураббий 21 ёшли тажрибасиз Кимпембега ишонч билдирди. МСН бошчилигидаги “Барселона”га қарши Кимпембе ажойиб ҳаракат қилди. Париж ҳимояси “оқсоқоли” Маркинёс билан ажойиб жуфтлик ҳосил қилди.
Эмерсон (“Рома”)
“Вилярреал” меҳмони бўлган римликлар мезбонларни аяб ўтиришмади. Европа Лигаси 1/16 босқичи дастлабки учрашувидаёқ кейинг босқич масаласини амалда ҳал қилишди. “Рома”нинг бразилиялик ҳимоячиси эса ўз қанотида ажойиб ҳаракат қилди. Унинг узоқдан берган зарбаси ажойиб гол билан якунланди.
Марко Верратти (“ПСЖ”)
Парижликлар ярим ҳимоясининг етакчиси Верратти каталонияликларга қарши ўзининг энг ёрқин учрашувини ўтказди. Рақибга тинимсиз уюштирилган босимлар, ярим ҳимоядаги шерикларини тўлдира олиши, узоқ ва яқин масофаларга аниқ тўп узатишлари билан италиялик футболчи учрашувнинг қаҳрамонларидан бирига айланди.
Адрьен Рабьо (“ПСЖ”)
Унай Эмери жамоасининг навбатдаги қаҳрамонларидан бири Рабьо бўлди. Тиаго Моттанинг дисквалификацияси сабабли таянч ярим ҳимоячиси вазифасини ўташи керак бўлган Адрен баҳсдан олдин кўпчилик футбол мутахассислари томонидан шубҳа билан қаралди. Матюиди билан бирга “Барселона” ҳужумчиларини “қуролсизлантирди”.
Анхел Ди Мария (“ПСЖ”)
2017-йилни аргентиналик футболчи ажойиб тарзда бошлади. Биринчи мавсумни кўтаринки руҳда ўтказа олмаган Ди Мария атрофида турли миш-мишлар пайдо бўла бошлади. Янги йилдан эса Анхел Ди Мария ўзининг маҳоратини қайта намоён эта бошлади. «Барселона»га қарши баҳсда иккита бир-биридан чиройли голлар муаллифига айланди. Бутун ўйин давомида жуда фаол ўйин кўрсатди.
Тиаго Алкантара («Бавария»)
«Арсенал«ни аяб ўтирмаган «Бавария» таркибида Тиаго Алкантара дублга эришди. «Тўпчилар» ҳимоясини ўта қийин аҳволда қолдирган испаниялик футболчи жамоасининг энг фаол ўйинчиларидан бири бўлди.
Карим Бензема («Реал» Мадрид)
«Наполи«га қарши баҳсда Бензема ажойиб ҳаракат қилди, дея оламиз. Ўйиннинг бошидаёқ қулай имкониятни кўкка совурган бўлишига қарамай, жамоасининг дастлабки голига муаллифлик қилди. Карвахалнинг узатган ажойиб зарбасини боши билан Пепе Рейна қўриқлаётган дарвозани ишғол қилди. Унинг бу голи Чемпионлар Лигасидаги 51-голи бўлди ва Карим ҳамюрти Терри Анридан ўзиб кетди.
Эдин Жеко («Рома»)
Европа Лигасининг 1/16 босқичи сўзсиз «Рома»нинг босниялик ҳужумчисига аталди. Меҳмонда «Вилярреал» жамоасини 4-0 ҳисобида енгган римликлар сафида Эдин Жеко хет-трик муаллифига айланди. 8 гол билан Жеко Европа Лигаси тўпурарлар баҳсида етакчиликни мустаҳкамлаб олди. Бутун мавсум мобайнида эса Жеко ҳисобида 28 гол бор.
